Almatylyqtar saıası qýǵyn-súrgin jáne asharshylyq qurbandarynyń rýhyna taǵzym etti
ALMATY. KAZINFORM – Almatyda zııaly qaýym ókilderi saıası qýǵyn-súrgin qurbandaryn eske alyp, 1931-33 jyldardaǵy asharshylyq qurbandaryna arnalǵan eskertkishke gúl shoqtaryn qoıdy.
Qaraǵaıly saıabaǵynda ótken is-sharaǵa saıası qýǵyn-súrgin jáne asharshylyq qurbandarynyń týystary men jaqyndary, mádenıet qaıratkerleri, qoǵam ókilderi men qala turǵyndary qatysty. Olar qaza bolǵandardy bir mınýt únsizdikpen eske alyp, eskertkishke gúl shoqtaryn qoıdy.
Jınalǵandar qaıǵyly oqıǵalardy este saqtap, saıası qýǵyn-súrgin qurbandaryn aqtaý boıynsha jumysty jalǵastyrý qajettigin atap ótti. Qazaqstannyń bostandyǵy men táýelsizdigi úshin qandaı qurbandyqtyń bolǵanyn jáne olardy ulyqtaý qanshalyqty mańyzdy ekenin de tilge tıek etti.
— Búgin biz qýǵyn-súrgin men asharshylyq kezinde qaza tapqan ata-babalardyń rýhy aldynda adamı jáne azamattyq boryshymyzdy óteý úshin jınaldyq. Bir mınýttyq únsizdik — este saqtaýdyń, qurmettiń jáne sabaq alýdyń belgisi. Bizdiń mindetimiz — ótkenniń aýyr kezeńderin este saqtaı otyryp, búgingi birlik pen beıbitshilikti bekemdeý, — dedi Darhan Satybaldy.
Búgin Prezıdent «ALJIR» saıası qýǵyn-súrgin jáne totalıtarızm qurbandarynyń memorıaldy-murajaı keshenine bardy.