Almatylyqtar lyq tolǵan avtobýstarǵa shaǵymdanyp jatyr
ALMATY. KAZINFORM – Almatylyqtar arasynda avtobýstarǵa qatysty suraq pen shaǵym jıiledi.
Qala turǵyndary aıaldama men qoǵamdyq kólik ishindegi jaǵdaılardy áleýmettik jelide jarııalap júr. Ásirese, qarbalas ýaqytta avtobýstarǵa miný qıyndyq týdyratyny týraly pikirler kóp.
Máselen, jeli qoldanýshylarynyń biri №38 baǵyttaǵy lyq tolǵan avtobýstyń beınejazbasyn jarııalaǵan. Onda kólik ishine qıyndyqpen kirgen áıeldiń aıaǵy esik jabylǵanda syrtta qalyp qoıǵanyn kórýge bolady.
Jazbaǵa pikir qaldyrǵan Elena Kegaı esimdi turǵyn da kólik baǵyttaryndaǵy avtobýstar sany jetkiliksiz ekenin aıtqan.
- Keıde kelesi avtobýsty 20 mınýt kútý kerek bolady. Keıde ekeýi birdeı kelip, jarysa jóneledi. Bul megapolıs úshin durys emes, - dep jazdy ol.
Atalǵan jaǵdaıǵa baılanysty Jol qozǵalysyn uıymdastyrý jáne jolaýshylar kóligi basqarmasy jaýap berdi.
- №38 avtobýs baǵytynyń jumysyn jaqsartý maqsatynda buǵan deıin qozǵalys kesteleri qaıta qaralyp, reıster sany kóbeıtildi jáne avtobýstardyń aıaldamada turý ýaqyty qysqartyldy, - delingen habarlamada.
Vedomstvo ókilderi joldardaǵy júktemege baılanysty, ásirese qarbalas ýaqytta keshigýler men kesteden aýytqýlar bolatynyn málimdedi.
- Bul óz kezeginde qozǵalys ıntervalynyń ulǵaıýyna jáne aıaldamalarda jolaýshylardyń jınalyp qalýyna ákep soqtyrady, - dep túsindirdi basqarmadan.
Eske salaıyq, buǵan deıin Almatynyń qandaı kóshelerinde bıyl birjaqty qozǵalys engizilgenin jazǵanbyz.
