Almatylyqtar krannan «qońyr» sý aǵyp turǵanyna shaǵymdandy
ALMATY. KAZINFORM — Almatydaǵy «Órkendeý» turǵyn úı kesheniniń turǵyndary krannan qoıý qońyr tústi sý aqqanyna narazy.
Áleýmettik jelilerde turǵyndar krannan aqqan las sýdy kórsetip, máseleni sheshýdi surady.
«Almaty Sý» málimetinshe, qaladaǵy ortalyqtandyrylǵan sýmen jabdyqtaý júıesi shtattyq rejımde jumys istep tur. Sýdy tazartý jáne zalalsyzdandyrý, sondaı-aq sý daıyndaý nysandary men magıstraldyq jelilerdegi onyń sapasyna zerthanalyq baqylaý táýlik boıy júrgiziledi.
— Sanıtarlyq normalardyń asýy jáne belgilengen standarttardan aýytqý tirkelgen joq, — dep habarlady kompanııa.
Onyń málimdeýinshe, atalǵan aýmaqtaǵy qalalyq jeliler men sýmen jabdyqtaý nysandarynda sýdyń sapasyna áser etýi múmkin josparly jóndeý nemese apatty-qalpyna keltirý jumystary júrgizilmegen.
Áleýmettik jelidegi vıdeodan keıin sý arnasynyń mamandary turǵyn úı keshenine baryp, komıssııalyq tekseris júrgizdi. Tekserý nátıjesinde atalǵan turǵyn úı keshenindegi sýyq sýdyń sapasynan eshqandaı aýytqý anyqtalmaǵan.
«Almaty Sý» tekseris nátıjesin rastaý úshin krannan qońyr emes sý aǵyp turǵan vıdeo da usyndy.
Eske salsaq, Almatyda memleketke qaıtarylǵan qarajatqa 10,5 myń turǵyn aýyz sýmen qamtylǵanyn jazǵanbyz.
