Almatylyqtar Qonaevtyń eskertkishine gúl shoqtaryn qoıdy
Búgin Almatyda asa kórnekti memleket jáne qoǵam qaıratkeri, úsh márte Sotsıalıstik Eńbek Eri, Qazaq KSR Ǵylym akademııasynyń akademıgi, tehnıka ǵylymdarynyń doktory Dinmuhamed Qonaevtyń eskertkishine gúl shoqtaryn qoıý rásimi ótti. Sondaı-aq D.A.Qonaevtyń memorıaldy páter-mýzeıinde ekskýrsııa uıymdastyryldy, dep habarlaıdy Kazinform.
Іs-sharaǵa jınalǵan zııaly qaýym ókilderi men týǵan-týystary memleket jáne qoǵam qaıratkeriniń ómiri men elimizdiń damýyna qosqan úlesi týraly estelikterimen bólisti.
«Qonaevtyń óziniń týǵan balalary bolmady, taǵdyry solaı boldy. Ol kisi týǵan-týystaryna, jaqyn jıenderine jalpy jastarǵa erekshe qaraıtyn. Mysaly, jeltoqsan oqıǵasy kezinde jastar úshin qatty ýaıymdady. Ol kisi óte meırimdi jan edi. Tipti, qol astyndaǵy qyzmetkerleri jumystaryn qajetti deńgeıde atqara almasa, olardyń kóńiline qaıaý túsirmeı jetkizetin», - deıdi memleket jáne qoǵam qaıratkeriniń týysy Eldar Qonaev.
Memorıaldy páter-mýzeıiniń jetekshisi Elena Kýbashevanyń aıtýynsha, Dinmuhamed Qonaevtyń murajaı úıi Qonaevty tek memleket qaıratkeri retinde ǵana emes, shynaıy ómirde bolǵan tulǵa retinde de ashyp kórsetedi.
«Mýzeı 2002 jyly D. Qonaevtyń 90 jyldyǵyna oraı ashylǵan bolatyn. On jyldan keıin atamyz turǵan úı, ıaǵnı, páteri de mýzeı bolyp ashyldy. Munda 8 myńnan astam jádiger bar. Mýzeıge kelýshiler Qonaevtyń júrip ótken jolymen tanysa alady. Mýzeıdegi eń qundy dúnıelerdiń biri atamyzdyń is saparalarynda túsken fotolary. Bul jerden aqparatty qazaq, orys jáne aǵylshyn tilinde alýǵa bolady. Byltyr mýzeıge 35 myńnan astam adam keldi», - deıdi mýzeı jetekshisi Elena Kýbasheva.
Búgin Dinmuhamed Qonaevtyń týǵanyna - 112 jyl.
Dinmuhamed Ahmetuly Qonaev 1912 jyly 12 qańtarda qazirgi Almaty qalasynda dúnıege kelgen. 1930 jyly Almatydaǵy №14 orta mektepti bitirgen Dinmuhamedti Qazaqstan Ólkelik komsomol komıteti 1931-1936 jyldary Máskeýdegi Tústi metall ınstıtýtyna oqýǵa jiberedi. 1936 jyly osy ınstıtýttan taý-ken ınjeneri mamandyǵyn alyp shyqqan ol 1937-1939 jyldary Balqash mys qorytý kombınatynyń Qońyrat rýdnıgine jumysqa ornalasyp, onda burǵylaý stanoginiń mashınısi, tseh bastyǵy, rýdnıktiń bas ınjeneri jáne onyń dırektory boldy.
