Almatylyqtar qoqysty suryptaýǵa daıyn emes - Dosaev
ALMATY. KAZINFORM - Almaty ákimi Erbolat Dosaev Naýryzbaı aýdanynyń turǵyndarymen kezdesti.
Kezdesý kezinde shahar basshysy qoqys shyǵarý máselesine toqtaldy. Ákimniń aıtýynsha, 2023 jylǵa deıin qoqys shyǵaratyn kompanııalardy eshkim tártipke shaqyrmaǵan.
- Olar qoqysty óz qalaýynsha tasyp júre berdi. Sondyqtan uzaq merzimdi kelisimshartty buzyp, jańasyn jasastyq, - dedi ákim.
Sondaı-aq suraq-jaýap sessııa barysynda 2024 jyly krany bar 20 qoqys tasıtyn kólik alynǵany jáne bıyl taǵy 70-i jańaratyny aıtyldy.
Erbolat Dosaev óz sózinde qoqys suryptaý máselesine de toqtalyp ótti.
- Almatylyqtar qoqysty suryptaýǵa qanshalyqty daıyn degen suraq aýada qalqyp tur. Menińshe, keshke qaldyqtardy ártúrli paketke bólip otyrýǵa eshkim daıyn emes. Biraq bul ádetti qalyptastyrý boıynsha jumysty jalǵastyramyz. Jınaý, suryptaý, ýtılızatsııa jumystaryn qamıtyn tutas júıe jasaımyz, - dedi ol.
Eske salaıyq, buǵan deıin Almaty oblysynda 215 zańsyz qoqys úıindisi anyqtalǵanyn jazǵanbyz.