Almatylyqtar keńsede eń uzaq ýaqyt otyryp jumys isteıdi – zertteý
Qazaqstan boıynsha almatylyqtar keńsede eń uzaq ýaqyt otyryp jumys isteıdi. Bul týraly S.Asfendııarov atyndaǵy Qazaq ulttyq medıtsınalyq ýnıversıtetiniń (QazUMÝ) ǵalymdary júrgizgen zertteý barysynda anyqtaldy, dep habarlaıdy Kazinform.
QazUMÝ-dyń málimetinshe, zertteýdiń maqsaty halyqtyń fızıkalyq belsendiliginiń túrli aspektileri men az qozǵalysty ómir saltynyń taralýyn zertteýge arnaldy. Derekter ártúrli jas toptary men el aımaqtaryn qamtıtyn saýalnama arqyly jınaldy.
«Qazaqstan boıynsha almatylyqtar keńsede eń uzaq ýaqyt otyryp jumys isteıdi. Bul kórsetkish áıelder arasynda kúnine orta eseppen 370 mınýt, erler arasynda 360 mınýt bolǵan. Odan bólek, almatylyqtar ýaqytynyń edáýir bóligin belsendi fızıkalyq júktemelersiz ótkizedi. Bul jumys túrine, ómir saltyna, sondaı-aq ýrbanızatsııa men kólik quraldarynyń qoljetimdiligine baılanysty bolýy múmkin», - dep habarlady QazUMÝ-dyń baspasóz qyzmeti.
Bul rette astanalyqtardyń keńsede otyryp jumys isteýdiń ortasha ýaqyty 352 mınýtty bolsa, Qyzylorda oblysynda táýligine 205 mınýt, Túrkistan oblysynda 228 mınýt boldy.
«Eń tómengi ýaqyt kórsetkishi Atyraý oblysynda. Mundaǵy kórsetkishke kelsek, áıelderde 215 mınýt, erlerde 207 mınýt. Bul aımaqtyń turǵyndary belsendi ómir saltymen nemese fızıkalyq belsendilikti qajet etetin jumys sıpatymen erekshelenedi», - dep habarlady QazUMÝ.
Sondaı-aq ǵalymdar jumystan tys ýaqyttaǵy fızıkalyq belsendiklikti zerttedi. Zertteý barysynda almatylyqtar bos ýaqytta jaıaý júrý jáne velosıped tebýmen belsendi aınalysatyny anyqtaldy.
«Qala halqynyń 72%-y jaıaý júrýmen nemese velosıped tebýdi qalaıdy. Bul halyqtyń belsendi ómir saltyn qalyptastyrýda qala ınfraqurylymynyń róli joǵary ekenin kórsetedi. Astanada bul kórsetkish tómen (61,1%). Alaıda ol da qala turǵyndarynyń ómirinde jaıaý jáne velosıpedpen júrýdiń mańyzdy ekenin kórsetedi. Aqtóbe oblysynda eń tómengi kórsetkishi baıqalady – 49,3%. Bul jaıaý júrginshiler men velosıpedshilerge arnalǵan ınfraqurylymnyń jetispeýshiligi men aımaqtaǵy kólikke baǵyttalǵan qozǵalys úlgisin kórsetýi múmkin», - dep habarlady QazUMÝ-dan.
Sondaı-aq bos ýaqyttaǵy belsendiliktiń eń tómen deńgeıi egde jastaǵy adamdardyń arasynda anyqtaldy. Munda da Aqtóbe oblysy kósh bastap tur.
«Jasy men turǵylyqty jerine qaramastan, ár adam óziniń kúndelikti rejımine fızıkalyq belsendilikti qosýy mańyzdy. Bul taza aýada serýendeý, jattyǵý zalyna barý, júzý, velosıped tebý nemese tipti úıde qarapaıym jattyǵýlar bolýy múmkin. Jaıaý júrý nemese velosıpedpen júrýge basymdyq berý kerek. Bul fızıkalyq jaǵdaıyńyzdy jaqsartyp qana qoımaı, qorshaǵan ortanyń lastaný deńgeıin tómendetýge kómektesedi. Ásirese, egde jastaǵy adamdardyń belsendi ómir saltyn ustanýy óte mańyzdy. Sebebi ol kóptegen aýrýdyń qaýpin azaıtýǵa jáne jalpy ómir sapasyn jaqsartýǵa kómektesedi» - dedi B.Atshabarov atyndaǵy irgeli jáne qoldanbaly medıtsına ǵylymı-zertteý ortalyǵynyń basshysy Tımýr Salıev.
