Almatylyqtar qatty jer silkinisi kezinde qaıda jınalýy kerek

Máslıhat sessııasynda depýtat Muhtar Zúleev seısmıkalyq qaýipsizdik máselesin kóterdi. Ol Almaty turǵyndary jer silkinisin sezgenin aıtyp, jer asty dúmpýleri bolǵan jaǵdaıda turǵyndar jınalatyn naqty oryndar týraly surady.

— Almaty seısmıkalyq qaýipti aımaqta ornalasqan, sondyqtan seısmıkalyq qaýipsizdik máselesi asa ózekti. Turǵyndar kúshti jer silkinisi bolǵan jaǵdaıda qaıda barý keregin jáne qaýipsiz jınalý oryndarynyń qaı jerde ornalasqanyn aldyn ala bilýi mańyzdy. Qalanyń Bas josparynda mundaı oryndar qarastyrylǵan ba? — dep surady depýtat.

«Almatybasjospar» ǴZI dırektory Ashat Sádýov turǵyndar jınalatyn oryn retinde bilim berý nysandary men ashyq keńistikter qarastyrylatynyn aıtty.

— Qýatty jer silkinisi kezinde mektepter men basqa da áleýmettik nysandar tipti túngi ýaqytta da turǵyndardy qabyldaı alady. Sondyqtan Bas josparda bilim berý nysandarynyń aımaqtary 500 metrlik qoljetimdilik radıýsynda qarastyrylǵan. Olar jer silkinisi kezinde turǵyndar jınalatyn oryn retinde paıdalanylýy múmkin, — dedi Ashat Sádýov.

Onyń aıtýynsha, turǵyndardy jınaý úshin ashyq qoǵamdyq keńistikterdi, avtoturaqtar men qoǵamdyq ǵımarattardyń janyndaǵy alańdardy da paıdalanýǵa bolady. Mundaı aýmaqtar aǵashtar men elektr berý jelilerinen alshaq ornalasýy kerek.

— Bas josparda qazirdiń ózinde turǵyndar jer silkinisi kezinde jınalatyn oryn retinde paıdalanylyp júrgen nemese bolashaqta osyndaı maqsatta paıdalanylýy múmkin nysandar jetkilikti, — dep qosty «Almatybasjospar» ǴZI dırektory.

Aıta keteıik, 28 qyrkúıek kúni tańerteń Almaty turǵyndary 4 baldyq jer silkinisin sezindi. Jerasty dúmpýleri Astana ýaqytymen saǵat 09:38-de tirkeldi. Jer silkinisiniń oshaǵy Almaty aýmaǵynda ornalasqan.

Alaıda seısmologtar joıqyn jer silkinisi bolýǵa negiz joq ekenin aıtyp sendirdi.