Almatylyqtar qarashadan bastap jylý úshin jańa túbirtek alady: ne ózgeredi
ALMATY. KAZINFORM — Qarashadan bastap Almatyda jylý aqysy basqasha kórsetiledi. Endi turǵyndar bir sharshy metr úshin eseptelgen somasynyń ornyna tutynylǵan jylý kólemin gıgakalorııamen (Gkal) kóre alady.
Turǵyndar buryn tarıf ózgermese de, jylý aqysynyń nege aı saıyn ártúrli bolatynyn jıi suraıtyn.
«Almaty jylý júıesi» málimetinshe, bekitilgen tarıf bir gıgakalorııaǵa shaǵylyp belgilenedi. Alaıda buryn túbirtekterde tólemniń qorytyndy soma páterdiń bir sharshy metrine shaqqandaǵy eseppen kórsetilip kelgen.
Bul rette ár kópqabatty turǵyn úı jylýdy ártúrli kólemde tutynady. Úıdiń naqty qansha jylý paıdalanǵanyn ár ǵımaratta ornatylǵan ortaq jylý eseptegish quraly tirkeıdi.
— Jańartylǵan túbirtektegi «Jylytý» jolynda jylý kólemi, ıaǵnı eseptik kezeńde tutynylǵan gıgakalorııa sany; , bir gıgakalorııanyń quny, eseptelgen tólemniń jalpy somasy jeke-jeke kórsetiledi. Osylaısha, turǵyndar túbirtektegi somanyń qalaı shyǵatynyn jáne eseptik kezeńde qansha jylý tutynylǵanyn kóre alady, — dep habarlady kompanııa.
Kompanııanyń málimetinshe, jańa format tólem esebin túsinikti ári kórneki etedi. Endi turǵyndar tólenetin somamen qatar, onyń qandaı jylý kólemine negizdelip eseptelgenin de bile alady.
Eske salaıyq, Almatydaǵy № 2 JEO kómirden gazǵa kóship jatqanyn jazǵanbyz.
