Almatylyqtar qar durys kúrelmegen jaǵdaıda WhatsApp nómirge jaza alady
ALMATY. KAZINFORM – Qazgıdromet jasaǵan boljamǵa baılanysty Almatynyń kommýnaldyq qyzmetteri daıyndyq jumystaryn bastady.
Sınoptıkterdiń málimetine sáıkes, búgin túnde Almatyda aýa temperatýrasy -6… -8 gradýsqa deıin tómendeıdi, shamamen saǵat 04.00-den túske deıin qalyńdyǵy 4 sm-ge deıin qar jaýady. Joldar men trotýarlarda muz qatyp, kóktaıǵaq bolýy múmkin.
Sondaı-aq 20 qańtar kúni kúndiz kóshpeli bult shyǵyp, soltústik-shyǵystan jyldamdyǵy 2-7 m/s jel soǵady, aýa temperatýrasy -3...-5 gradýs bolady dep kútiledi.
Almaty ákimdigi qarmen kúreske qazirden kirisip ketti.
«Aýdan ákimdikterinde jumysty baqylaý úshin táýlik boıy kezekshilik uıymdastyryldy. 20 qańtarda kúndiz 412 arnaıy tehnıka men 1120 jumysshy jumyldyrylady. Túngi ýaqytta 436 arnaıy tehnıka men 219 jumysshyny tartý josparlanyp otyr. Qardy shyǵarýǵa 123 birlik, onyń ishinde 27 qar tıegish, qar tasıtyn 75 júk kóligi, 11 traktor, 10 avtogreıder jáne 156 jumysshy jumyldyrylady. Dıslokatsııa oryndarynda qar jaýǵanǵa deıin 146 qum shashatyn kólikter kezekshilikke shyǵady», - dep habarlady ákimdiktiń baspasóz qyzmetinen.
Qazirgi ýaqytta qalada trotýarlar men jol shetindegi jıektastardy qardan tazartý jumystary júrip jatyr. 19 qańtar, saǵat 18:00-degi jaǵdaı boıynsha 19 750 tekshe metr qar shyǵaryldy, ıaǵnı júk kólikteri 1 975 ret reıs jasaǵan.
Ákimdik ókilderi, sondaı-aq jolda, trotýarlarda jáne qoǵamdyq oryndarda qardyń durys kúrelmegenin kórgen jaǵdaıda +7 (706) 689 8898 WhatsApp nómirine habarlasýǵa bolatynyn aıtady.
Eske salsaq, almatylyqtar qala ákimi Erbolat Dosaevqa qalany qardan tazartý jumystaryna qatysty shaǵym aıtqan edi.
