Almatylyqtar qala kúnin atap ótip jatyr
ALMATY. KAZINFORM – Dástúr boıynsha qala kúnin almatylyqtar qyrkúıektiń úshinshi jeksenbisinde toılaıdy.
Qala aýmaǵynda kontsertter, kórmeler, fleshmobtar, festıvalder jáne túrli merekelik is-sharalar uıymdastyryldy. Merekelik baǵdarlamalar Astana alańyndaǵy kontsertten bastaldy. Onda qala ákimi Darhan Satybaldy almatylyqtardy jáne megapolıs qonaqtaryn merekemen quttyqtady.
- Almaty – Táýelsizdiktiń altyn besigi, elimizdiń jańa dáýiri bastalǵan shahar. Biz Almatyny zamanaýı, jaıly ári órkendegen qala etý úshin bar kúsh-jigerimizdi jumsap kelemiz. Memleket basshysy Qasym-Jomart Kemeluly Toqaev bizge birqatar mańyzdy mindet júktedi. Solardyń ishinde ekologııaǵa, qaýipsizdikke jáne qalalyq ortanyń sapasyna aıryqsha mán beriledi, – dedi Almaty ákimi.
Sondaı-aq Darhan Satybaldy shahardyń ınfraqurylymdyq damýyndaǵy basym baǵyttaryn atap kórsetti.
- Aldaǵy jyldary Almatyda halyqaralyq standarttarǵa saı zamanaýı ári ıntegratsııalanǵan kólik júıesi qalyptasatyn bolady. Qazirdiń ózinde uzyndyǵy 100 shaqyrymnan astam BRT jelisin damytý baǵdarlamasy iske asyrylyp jatyr. Onyń nátıjesinde qoǵamdyq kóliktegi jolaýshy tasymaly eki eseden astam artyp, qozǵalys jyldamdyǵy 15%-ǵa ósedi. Sonymen qatar, LRT jelileriniń qurylysy bastalyp, metronyń 20 km-den astam jańa tarmaǵy júrgiziledi, — dedi qala ákimi.
Darhan Satybaldynyń aıtýynsha, ekologııalyq transformatsııa Almatynyń basty basymdyqtarynyń biri bolyp qalady. Qalada tómen emıssııalyq aımaqtar engizilip, JEO-2 men JEO-3 tolyqtaı tabıǵı gazǵa kóshiriledi.
- Qazaqstandaǵy alǵashqy turmystyq qaldyqtardy energetıkalyq kádege jaratý zaýyty Almatyda salynady. Zaýyt táýligine 2 myń tonnaǵa deıin qaldyqty qaıta óńdep, jylyna 60 mVt elektr energııasyn óndiredi. Munyń bári 2028 jylǵa qaraı Almatydaǵy aýa sapasyn eki esege jaqsartýǵa múmkindik beredi, — dedi shahar basshysy.
Sondaı-aq Darhan Satybaldy óz jumysynyń basty baǵyttarynyń biri – IT-ınfraqurylymdy damytý, talantty jastardy qoldaý jáne ınnovatsııalyq jobalardy ilgeriletý ekenin basa aıtty.
- Týrızm baǵytynda da jańa jobalar qolǵa alynyp jatyr. Aldaǵy ýaqytta iske qosylatyn Almaty taý klasteri halyqaralyq sapa men ekologııa standarttaryna saı qurylyp, Ortalyq Azııadaǵy eń iri tórt maýsymdyq týrıstik jobaǵa aınalmaq, — dedi ol.
Eske salaıyq, buǵan deıin Almatyda qala kúni qarsańynda birneshe áleýmettik nysan ashylǵanyn jazǵanbyz.