Almatylyqtar HQO-ǵa qandaı qyzmet boıynsha jıi júginedi
ALMATY. KAZINFORM — Jyl basynan beri Almaty qalasynyń turǵyndary halyqqa qyzmet kórsetý ortalyqtary arqyly 1,2 mıllıonnan astam memlekettik qyzmet aldy.
«Azamattarǵa arnalǵan úkimet» memlekettik korporatsııasynyń Almaty qalasy boıynsha fılıaly málimetinshe, ótinishter sany boıynsha birinshi orynda jeke kýálik pen pasport rásimdeý qyzmeti tur. Bıyl bul qyzmetti 742 399 azamat paıdalanǵan. Olardyń qatarynda jeke kýálikti alǵash ret alyp jatqan jastar, sondaı-aq qujattarynyń qoldaný merzimi aıaqtalýyna nemese jeke derekteriniń ózgerýine baılanysty qujattaryn aýystyryp jatqan azamattar bar.
Ekinshi orynda — kólik quraldarynyń jekelegen túrlerin memlekettik tirkeý jáne esepten shyǵarý qyzmetteri. Jyl basynan beri bul qyzmetke 234 793 azamat júgingen. Taǵy 156 752 azamat kólik quraldarynyń jekelegen túrlerin alǵashqy memlekettik tirkeý qyzmetin aldy. Bul qyzmet kólik quralyn memlekettik esepke alǵash ret qoıý kezinde kórsetiledi.
Sonymen qatar 2026 jyly 61 244 azamat júrgizýshi kýáligin aldy.
— Osylaısha, eń kóp suranysqa ıe qyzmetterdiń qatarynda azamattardyń kúndelikti ómirinde jıi kezdesetin qyzmetter — negizgi qujattardy rásimdeý, kólik quraldaryn tirkeý jáne júrgizýshi kýáligin alý bar. Búginde kóptegen memlekettik qyzmetti alý úshin Halyqqa qyzmet kórsetý ortalyǵyna mindettit úrde barýdyń qajeti joq. Qyzmetterdiń bir bóligi tsıfrlyq formatta qoljetimdi, bul azamattarǵa ýaqytyn únemdep, qyzmet alýdyń ózine yńǵaıly tásilin tańdaýǵa múmkindik beredi, — dep habarlady memlekettik korporatsııasynyń Almaty fılıaly.
Eske salaıyq, Petropavldaǵy mamandandyrylǵan HQKO avtodromy ýaqytsha jabyldy.
