Almatylyqtar elektrsamokat erejesin buzǵandar týraly WhatsApp arqyly habarlaı alady
ALMATY. KAZINFORM — Almatylyqtar elektrsamokattardy paıdalaný erejesin buzǵandar týraly polıtsııanyń arnaıy WhatsApp nómirine habarlaı alady. Bul týraly Almaty polıtsııa departamenti málimdedi.
2026 jylǵy 25 tamyzdan bastap Almatyda elektrsamokattardyń trotýarlar men jaıaý júrginshiler jolymen júrýine tyıym salynady. Joldyń júris bóligimen tek 18 jasqa tolǵan, kez kelgen sanattaǵy júrgizýshi kýáligi jáne qorǵanysh dýlyǵasy bar azamattarǵa ǵana júrýge ruqsat etiledi.
Almaty polıtsııa departamentiniń resmı ókili Saltanat Ázirbek jańa talaptardyń oryndalýyn baqylaý kıksherıng kompanııalarymen birlesip júzege asyrylatynyn aıtty.
— Qorytyndy kezdesýde kıksherıng kompanııalarynyń ókilderi samokat tyıym salynǵan aımaqqa kirgen kezde júıe aldymen onyń jyldamdyǵyn tómendetip, keıin tolyq toqtatatynyn habarlady. Sondyqtan baqylaý keshendi túrde júrgiziledi: patrýldik ekıpajdar, jaıaý jáne samokattaǵy patrýlder, sondaı-aq samokattardyń tyıym salynǵan jerlerde júrýine múmkindik bermeıtin avtomatty shekteýler arqyly júzege asady, — dedi Saltanat Ázirbek Óńirlik kommýnıkatsııalar qyzmetindegi brıfıngte.
Onyń aıtýynsha, bir elektrsamokatqa eki adamnyń minýi sııaqty quqyqbuzýshylyqtar ázirge patrýldeý kezinde anyqtalady, óıtkeni qazirgi júıeler jolaýshylar sanyn anyqtaı almaıdy.
— Mundaı jaǵdaıda ákimshilik jaýapkershilik sharalary qoldanylady. Qala turǵyndarynyń belsendi azamattyq ustanymyna alǵysymyzdy bildiremiz. Bul olardyń qala qaýipsizdigine beıjaı qaramaıtynyn kórsetedi, — dedi ol.
Polıtsııa málimetinshe, 1 sáýirden beri Almatyda dýlyǵasyz júrgen 200-den astam elektrsamokat júrgizýshisi anyqtalǵan.
Sondaı-aq polıtsııa joldyń júris bóliginde jáne trotýarlarda retsiz qaldyrylǵan samokattardy jınap, arnaıy aıyp turaǵyna qoıady. Qazirgi tańda munda 4 myńǵa jýyq samokat saqtaýly. Quqyqbuzýshylyq joıylǵannan keıin kıksherıng kompanııalary olardy alyp kete alady. Aıyp turaǵynda turǵan ýaqyty úshin aqy alynbaıdy.
Saltanat Ázirbektiń aıtýynsha, quqyqbuzýshylyqtar týraly 102 nómirine, foto nemese beınematerıal jiberýge múmkindik beretin Jedel basqarý ortalyǵynyń omnıkanaldy servısteri arqyly, sondaı-aq eOtinish servısi arqyly habarlaýǵa bolady.
Budan bólek, jaqyn ýaqytta Almaty polıtsııasy biryńǵaı WhatsApp nómirin iske qospaq.
— Bul táýlik boıy jumys isteıtin jedel jeli bolady. Azamattar oǵan Jol qozǵalysy erejesin buzý faktileri ǵana emes, basqa da oqıǵalar, sonyń ishinde kúmándi kórshiler týraly da habarlaı alady, — dedi polıtsııa departamentiniń resmı ókili.
Sonymen qatar ol qoldanystaǵy zańnamada quqyqbuzýshylyq týraly habarlaǵan azamattardy yntalandyrý nemese marapattaý qarastyrylmaǵanyn atap ótti.
Eske salaıyq, buǵan deıin ІІM elektrsamokat pen mopedti kez kelgen jerge qaldyrýǵa bolmaıtynyn eskertken edi.
