Almatylyqtar dostyq pen beıbitshilik merekesin toılap jatyr
ALMATY. KAZINFORM — Ońtústik astanalyqtar Qazaqstan halqynyń birligi kúnin toılap jatyr. Respýblıka saraıynyń aldynda kóptegen ult pen ulystyń salt-dástúrine saı qolóner týyndylary men ulttyq tamaǵy, kıimderi qoıylǵan birlestik úıleri tigildi.
Almatyda Qazaqstan halqy Assambleıasynyń 30 jyldyǵyna oraı Qazaqstan halqynyń birligi kúni keń kólemde toılanyp jatyr.
— Birlik kúni — bizdiń basty kúshimiz — mádenı ártúrlilik ekenin eske salatyn kún. Almaty — ultaralyq kelisim men dostyqtyń qalasy. Assambleıanyń mereıtoılyq jylynda árbir turǵyn ózin úlken, uıymshyl qoǵamnyń bir múshesi retinde sezinýi úshin jumysymyzdy jalǵastyramyz. Bul qoǵamda mádenıet, dástúr men ózara qurmet eń joǵary qundylyq sanalady, — dedi Almaty qalasy Qazaqstan halqy Assambleıasy tóraǵasynyń orynbasary Vsevolod Lýkashev.
Abaı alańyna halyq kóp jınaldy. Kóńilderi kóterinki, bir-birin quttyqtap jatyr. Árbir ult óziniń mádenıetinen syr shertetin kórme usyndy. Ánin shyrqap, bıin bıledi. Merekege qala ákimi Erbolat Dosaev qatysty.
Merkelik shara kontserttik baǵdarlamamen ulasty. Sahnada qazaqstandyq estrada juldyzdary — L Duo dýeti, pıanıst Ratovich, «Dervıshı» jáne Madein KZ toptary óner kórsetti. Kontserttiń hedlaınerleri QR Halyq ártisi Roza Rymbaeva men Bashqurtstannan kelgen Ay Yola toby boldy.
Budan bólek, mektep oqýshylarynan bastap zeınetkerlerge deıin 300 — ge jýyq adam qatysqan Tuńǵysh Prezıdent saıabaǵyndaǵy «Birlik júgirisi» birliktiń sımvoly boldy.
Merekelik sharaǵa jınalǵandar qazaq qashannan da baýyrmal halyq ekenin tilge tıek etti.
— Bul kún — biz úshin jaı ǵana mereke emes, ortaq tarıh pen taǵdyrdyń sımvoly. Biz árbir ult dástúrin saqtap, el damýyna úles qosa alatyn memlekette ómir súrip jatqanymyzdy maqtan tutamyz. Mundaı is-sharalar ózara túsinistik pen mádenı alýandyqtyń elimizdiń bolashaǵy úshin qanshalyqty mańyzdy ekenin kórsetedi, — dedi Qazaqstan uıǵyrlarynyń respýblıkalyq mádenı ortalyǵynyń tóraǵasy Abdýlhalıl Dolkýntaı.
Keshke Abaı alańyndaǵy kontsertte Aıqyn Tólepbergen, Búrkit, «Marsel» toby jáne basqa da ártister óner kórsetetin bolady.
Aıta keteıik, Qazaqstan Halyqtarynyń Birligi kúninine arnalǵan is-sharalar qalanyń barlyq aýdanynda toılanyp jatyr.