Almatylyqtar bir jylda qaıta óńdeýge 700 tonna kıim ótkizdi
ALMATY. KAZINFORM — Almatyda «FABRIQA» jobasy aıasynda 2025 jyly shamamen 700 tonna toqyma jınaldy.
Joba avtory Denıs Lekomtsev «FABRIQA» maqsaty — Almatyda toqyma materıaldaryn jınaý, suryptaý jáne qaıta óńdeý ekenin atap ótti. Óndiris 2025 jyldyń aqpan aıynda grantsyz, jeke ınvestıtsııanyń esebinen iske qosylǵan. Qalada kıim jınaýǵa arnalǵan jeke konteınerler jelisi, qoıma, suryptaý men óndiris oryndary jumys isteıdi.
Onyń sózinshe, bir jarym jyldaǵy tájirıbe Almaty turǵyndarynyń qajetsiz kıimdi qaıta óńdeýge tapsyrýǵa daıyn ekenin kórsetken.
— Keıbir konteınerler bosaǵannan keıin úsh-jeti saǵatta qaıta tolyp qalatyn. Biz kıimderdi alyp úlgermeı jattyq. Bir jarym jyl ishinde turǵyndar kıim ákelýdi toqtatqan joq. Kerisinshe, bokstar týraly kóbirek bilgen saıyn, olar soǵurlym tez tola bastady. Meniń oıymsha, bul Almatydaǵy qaldyq máselesine qatysty eń jaqsy jańalyqtyń biri: qalada sanaly tutyný mádenıeti qalyptasqan, olarǵa tek qaldyqty qaıda aparyp tapsyrý kerektigin kórsetip, jol nusqaý kerek, — dedi Denıs Lekomtsev.
Onyń aıtýynsha, qoqys suryptaý keshenderinde ádette qaǵaz, shyny, metall men plastıkti bólinip alady da, toqyma buıymdary suryptalmaıdy. Sondyqtan eń tıimdi tásil — kıimdi turǵyn úılerdiń mańynda birden bólek jınaý qajet.
— Negizgi mindet — zatty qaıta óńdeý emes, ony qaıta paıdalaný men múmkindiginshe uzaq qoldaný. Qaıta óńdeý — basqa joly qalmaǵanda isteıtin eń sońǵy amal. Sondyqtan sekond-hend dúkenderdi, aıyrbastaý men jóndeýdi damytý qazirgi ýaqytta asa mańyzdy, — dedi joba avtory.
Eske salaıyq, qaıta óńdeýge 131 myń tonnadan astam qaldyq jiberildi.
