Almatylyqtar bir túnde 160 ret jol erejesin buzǵan
ALMATY. KAZINFORM — Almatyda polıtseıler bir túnde 160 jol erejesin buzý faktisin anyqtady.
Almatyda «Shýly kólik» jedel-profılaktıkalyq is-sharasy 23-30 qyrkúıek aralyǵynda ótkizilip jatyr. Polıtsııa qyzmetkerleri belgilengen talaptardy buzyp, jol qozǵalysyna qaýip tóndiretin avtokólikterdi, mototsıklder men mopedterdi jáne basqa da kólik quraldaryn tekserip jatyr.
Іs-shara aıasynda Ákimshilik polıtsııanyń mamandandyrylǵan batalony men basqa da saptyq bólimshelerdiń qyzmetkerleri reıdke shyqty.
Polıtseıler drıft jasap, qaýipti manevrge baryp, kóliktiń qatty dybys shyǵarýyna jol beretin jáne jol qozǵalysy erejelerin óreskel buzatyn júrgizýshilerdi anyqtady.
Bir túnniń ózinde jol qozǵalysy erejesin buzýdyń 160 deregi anyqtaldy.
Onyń ishinde:
* Tynyshtyqty buzý — 33 ret,
* Ruqsatsyz qaıta jabdyqtalǵan kólikti basqarý — 31 derek,
* Manevr jasaý erejelerin buzý — 24 derek
* Apattyq jaǵdaı týǵyzý — 12 derek.
Sonymen qatar mas kúıinde kólik basqarǵan 6 júrgizýshi anyqtaldy.
74 kólik aıypturaqqa qoıyldy. Onyń ishinde sheteldik memlekettik nómiri bar 11 avtokólik jáne bir mototsıkl bar.
Polıtsııa kóliktiń qatty gúrili, kúrt qozǵalysy nemese túngi drıft tek turǵyndardyń tynyshtyǵyna ǵana emes, joldaǵy barlyq adamnyń qaýipsizdigine áser etetinin eskertti.
Eske salaıyq, polıtsııa 372 drıft faktisin anyqtaǵany habarlandy.
