Almatylyqtar bıyl ınternet-alaıaqtarǵa 500 mln aýdarǵan
ALMATY. KAZINFORM — Almaty polıtsııasynyń Kıberqylmysqa qarsy is-qımyl basqarma bastyǵynyń orynbasary Erkebulan Qoıshybaev alaıaqtyqqa qarsy jumys týraly baıandady.
— Alaıaqtar jasandy ıntellekti jıi paıdalanatyn boldy. Keıingi 6 jylda mundaı qylmystyń sany eki esedeı artqan. 2020 jyly 1677 fakt tirkelse, byltyr ol 2851-ge jetti. Bul máseleniń óte ózekti ekenin kórsetedi, — dedi ol.
Jyl basynan beri Almatyda 700-den astam ınternet-alaıaqtyq tirkelip, onyń 300-den astamy ashylǵan. Jalpy keltirilgen shyǵyn 490 mln 473 myń teńgege bolǵan. Onyń 229 mln 702 myń teńgesi ótelgen. Sonymen qatar banktermen jáne baılanys operatorlarymen birlesip, 45 mln teńgeden astam somany aýdarmaq bolǵan 42 qylmystyq árekettiń de jolyn kesken.
Erkebulan Qoıshybaevtyń aıtýynsha, qazir Deepfake-alaıaqtyq, daýys salý, avtomattanǵan chat-bottar men jalǵan qujat jasaý keń taraǵan. JI alaıaqtarǵa bankter nemese memlekettik organdar atynan saýatty habarlama jazyp, jábirlenýshimen sóılesip, aqshasyn, jeke derekterin aldap alýǵa múmkindik beredi.
— Biz mundaı qylmyspen keshendi túrde ǵana kúresýge bolatynyn túsinemiz. Bul — tehnologııalardy damytyp, halyqpen etene jumys istep, bankter men IT-kompanııalarmen birlesip jumys isteý. Azamattardyń ózderi de muqııat bolyp, kıberqaýipsizdiktiń qarapaıym erejesin saqtaýy kerek. Bul alaıaqqa arbalyp qalýdan saqtaıdy, — dedi ol.
Tártip saqshylary kúmándi siltemelerge ótpeýge, shuǵyl aqsha aýdarýdy suraǵandarǵa sene salmaı, aqparatty tekserip alýǵa shaqyrady. Jeke derekterdi de bermeı, eki faktorly aýtentıfıkatsııany qoldaný kerek.
Eske salaıyq, Túrkistanda ınternet-alaıaqtyq shemalaryna qatysy bar 239 dropper áshkerelendi.