Almatylyqtar aýdan ákimshiligi ǵımaratynyń qaıta jóndeý jumystaryn synǵa aldy
ALMATY. KAZINFORM — Almatylyqtar áleýmettik jelide Almaly aýdany ákimdigi ǵımaratynyń qaıta jóndeý jumystaryn synǵa alyp, onyń tarıhı kelbetin joǵaltýy múmkin dep alańdaýshylyq bildirdi.
Ǵımarat Abylaı han dańǵyly men Áıteke bı kóshesiniń qıylysynda ornalasqan, ol aýdannyń tanymal sáýlet nysandarynyń biri.
Talqylaýǵa qurylys qorshaýyna ilingen jobalyq eskız, sondaı-aq ǵımarattyń qasbetindegi elementterin buzý jumystarynyń jalǵasýy sebep boldy. Turǵyndar bul jumys ǵımarattyń bastapqy kelbetin buzýy múmkin dep qaýiptenedi.
Keıbir áleýmettik jeli qoldanýshylary jańa materıaldardyń sapasyna kúmán keltirip, olardyń beriktigi men estetıkasy jaǵynan qazirgi materıaldardan tómen bolýy múmkin ekenin atap ótti. Basqa pikir bildirýshiler baǵanalardy, qasbettiń basqa sándik elementterin saqtaýdy suraıdy.
— Biz eski ǵımarattardy qalpyna keltirýge qarsy emespiz, biraq osyndaı sırek kezdesetin nysandardy nege múmkindiginshe saqtaı almaımyz? Olar saýsaqpen sanarlyqtaı az, — dep jazdy jeli qoldanýshylary.
Qala turǵyndarynyń suraýlaryna jaýap retinde qala qurylys basqarmasy rekonstrýktsııa jobasy ǵımarattyń tehnıkalyq jaǵdaıy men onyń beriktigin arttyrý qajettiligin eskere otyryp ázirlengenin túsindirdi. Atap aıtqanda, jobada bar qurylymdyq elementterdi kúsheıtý, bólmelerdi ishinara qaıta josparlaý, shatyrdy aýystyrý, múmkindigi shekteýli azamattar úshin qoljetimdilikti qamtamasyz etý, sondaı-aq lıft ornatý qarastyrylǵan.
— Syrtqy qabyrǵalardyń fasadtaryn demontajdaý olardy kúsheıtý qajettiligine baılanysty josparlanyp otyr. Bul jumystar aıaqtalǵannan keıin syrtqy qabyrǵalardy oqshaýlaý, odan keıin jeńil materıaldardyń kómegimen ǵımarattyń bastapqy kelbetin qalpyna keltirý jumystary júrgiziledi. Sándik elementter men baǵanalar qalpyna keltiriledi, tóbeler tegistelip, tazalanyp, joǵary beriktigi bar boıaýmen boıalady. Osylaısha, ǵımarattyń sáýlettik kórinisi saqtalady. Sonymen qatar qasbetterdi jaryqtandyrý da qarastyrylǵan, — dep habarlady basqarma.
Aıta ketý kerek, bul tarıhı nysan 1963 jyly salynǵan.
Aıta keteıik, Almatyda zańsyz salynǵan nysan buzyldy. Buǵan deıin menshik ıesine qatysty jospardan tys tekserý júrgizilip, onyń qorytyndysy boıynsha is materıaldary Almaty qalasynyń Ákimshilik quqyq buzýshylyqtar jónindegi mamandandyrylǵan aýdanaralyq sotyna joldanǵan. Sonyń negizinde ákimshilik sharalar qabyldandy.
