Almatylyqtar Atyraý oblysyna gýmanıtarlyq kómek jiberdi

ALMATY. KAZINFORM - 7 sáýir kúni Atyraý oblysynda sý tasqynyna baılanysty tabıǵı sıpattaǵy tótenshe jaǵdaı rejımi jarııalandy. Osyǵan baılanysty zardap shekken aımaqqa Almaty qalasy ákimi apparatynyń qutqarý qyzmetiniń kúshimen gýmanıtarlyq kómek jiberildi.

Almaty ákimdiginiń málimetinshe Atyraý oblysyna kómekke 3 «KamAZ» júk kóligi, 1 jeńil avtokólik, shants quraldary (kúrek, balta, súımen jáne t.b.) jiberildi. Sondaı-aq, shatyrlar, kereýetter, shamdar, qutqarý keýdesheleri, rezeńke etik, 5 myń qap, dári-dármekter bar.

Eske salsaq, ótken aptada Almatydan sý tasqynynan zardap shekken óńirlerge gýmanıtarlyq kómektiń birinshi partııasy jóneltilgen edi. 

Sondaı-aq 29 naýryzdan bastap qalada Almaly aýdanynyń kommýnaldyq ortalyǵy bazasynda ashylǵan qabyldaý pýnkti jumys isteıtinin jazǵanbyz. Kún saıyn almatylyqtar qajetti zattardy ákelip, tabıǵı apattan zardap shekken óńirlerge kómek kórsetýge úlesterin qosty. Qala turǵyndary, kásipkerler, jastar qajetti kómekti jınaýǵa belsene qatysty. 6 kúnde 10 tonnaǵa jýyq gýmanıtarlyq kómek jınaldy. 

Atap aıtqanda, 2,5 tonnadan astam kıim, 1 tonna gıgıena quraldar, 3,5 tonnadan astam azyq-túlik, turmystyq zattar jáne t.b.