Almatylyqtar arasyndaǵy allergııanyń negizgi sebepteri ataldy
ALMATY. KAZINFORM — Allergııany emdeý tásilderi týraly joǵary sanatty allergolog-ımmýnolog, medıtsına ǵylymdarynyń doktory, QazUMÝ-dyń jalpy ımmýnologııa kafedrasynyń professory Taıyr Nurpeıisov aıtyp berdi.
Onyń aıtýynsha, Almatyda allergııasy bar adamdardyń sany 20–40 paıyzǵa jetip qalady.
Naýqastardyń kópshiligi jastar men balalar, biraq allergııasy bar egde jastaǵy turǵyndar da joq emes.
— Allergııanyń negizgi belgileri — murynnan sý aǵý, muryn bitelýi, muryn men kózden bólindiler shyǵady, túshkirý, keıde jótel paıda bolyp, aýa jetispeı turǵandaı bolady. Kópshilik maýsymdyq allergııa men JRVI-di jıi shatastyrady, sebebi bulardyń qatty aıyrmashylyǵy joq. Allergııa belgileri basqa aýrýlarǵa uqsaı beredi, — dedi Taıyr Nurpeıisov.
Dáriger allergııany óz betinshe emdeý, ásirese antıbıotıkterdi esepsiz qabyldaý asqyndyryp jiberýi múmkin ekenin atap ótti.
Aıtýynsha, pandemııadan keıin Almatyda dáriden allergııa bolǵandar jıilegen.
— Antıbıotıkterdi óz betinshe qabyldaý kóbinese keri áser etedi. Allergııaǵa beıim adamdarda dárilik allergııanyń paıda bolý qaýpi áldeqaıda joǵary. Ókinishke qaraı, pandemııadan keıin bizdiń dárigerler osyndaı jaǵdaıǵa jıi tap bolyp júr, — dedi ol.
Mamannyń aıtýynsha, Almatydaǵy negizgi allergender — aǵashtar men shalǵyn shópterdiń tozańy. Olardyń ishinde eń jıi kezdesetini — qaıyń, terek. Sondaı-aq ártúrli shóp túrleri, sonyń ishinde atqonaq, úıbıdaıyq pen tarǵaqshóp. Bul ósimdikterdiń tozańy alysqa tarap, qalany kezip júredi.
Dáriger qazir allergenge arnaýly ımmýnoterapııa (ASIT) keńinen qoldanylyp júrgenin jáne oleń tıimdi emdeý ádisiniń biri sanalatynyn aıtty. Odan bólek allergııalyq rınıtti emdeý úshin aýrýdyń belgilerin basatyn dáriler men murynǵa arnalǵan arnaýly spreıler paıdalanylady.
Taıyr Nurpeıisov qala turǵyndaryn densaýlyǵyna muqııat qarap, allergııanyń belgisi baıqalsa birden mamandarǵa júginýge shaqyrdy.
Eske salaıyq, buǵan deıin Almatyda allergııa men tynys alý aýrýlaryna mamandanǵan ortalyqtar qurylatynyn jazǵanbyz.