Almatylyqtar ákimnen asfalt zaýytyn qala syrtyna kóshirýdi surady

ALMATY. KAZINFORM – Almaty ákimi Erbolat Dosaev asfalt-beton zaýytynyń ıesimen ony kóshirý jóninde kelissózder júrgizip jatqanyn aıtty.

«Aınabulaq-2» yqshamaýdanynyń turǵyny ákimnen asfalt-beton zaýytynan shyǵatyn ótkir ıiske shaǵymdandy.

– Aınabulaq-2 aýdanynda asfalt- beton zaýyty bar, onyń kimdiki ekenin bilmeımin. Tańerteń jáne túnde odan ótkir ıis shyǵady, terezelerdi ashý múmkin emes. Qandaı hımııalyq zattardy qoldanatynyn bilmeımin, biraq bul máseleni sheshýdiń joly bar ma? Zaýytty qalanyń syrtyna kóshirý nemese tazartý súzgisin ornatý kerek shyǵar, – dep shaǵymdandy turǵyn.

Erbolat Dosaevtyń aıtýynsha, zaýyttyń sanıtarlyq talaptaryn ákimdik qadaǵalap otyr.

– Qysta zaýyt belsendi jumys istemeıdi. Al, jol qurylysy maýsymy bastalǵan kezde jumys qyzady. Bul qaladaǵy jalǵyz zaýyt. Zaýytty kóshirý, ınvestıtsııa salý, onymen ne isteýge bolatyny týraly ıelerimen kelissózder júrgize bastadyq. Eshkim bir orynda turǵan joq. Zaýyt ıesiniń qonys aýdarýǵa ınvestıtsııa salýy úshin múmkindigin eskerýimiz kerek, al biz óz kezegimizde jer telimimen, qajetti ınfraqurylymmen qamtamasyz etýimiz qajet. Jyl sońyna deıin ortaq josparlarymyzdyń nátıjesin kóremiz degen senimdemiz, – dedi ákim.

Ol sondaı-aq qaramaǵyndaǵylarǵa zaýytty kóshirý týraly túpkilikti sheshim qabyldaǵanǵa deıin bıyl qosymsha súzgiler ornatýdy jáne sanıtarlyq normalardy saqtaýdy tapsyrdy.

– Ókinishke oraı, men búgin zaýytqa qatysty táýekelderge bara almaımyn. Óıtkeni biz asfalt-betondy basqa jaqtan jetkize almaımyz. Onyń temperatýralyq jaǵdaıy eskerilýi kerek. Qalada jalǵyz zaýyt qaldy, – dedi Erbolat Dosaev.

Osyǵan deıin «Almaty Sıtı» turǵyn úı kesheninde turatyn almatylyqtar ákimnen qaǵaz shyǵarý zaýyttynyń jumysy turǵyndardyń densaýlyǵyna zııanyn tıgizip jatqanyn aıtqan bolatyn.

Budan bólek, «Nomad» turǵyn úı kesheniniń turǵyndary ákimnen aýyr mashına jasaý zaýytyn qala syrtyna kóshirýdi suraǵan bolatyn.