Qazaqstan aýmaǵyna 5 Frantsııa syıady, al bir Frantsııada 56 atom reaktory bar — Baný Nurǵazıeva
ALMATY. KAZINFORM — Qazaqstanda atom elektr stantsııasyn salý máselesi boıynsha «Almatybasjospar» ǴZI ǵımaratynda qoǵamdyq talqylaý ótip jatyr.
Qoǵamdyq talqylaýǵa qoǵamdyq keńes músheleri, sarapshylar jáne qala turǵyndary qatysty. Jıyn barysynda elimizdegi atom energetıkasyn damytýdyń josparlary tanystyryldy.
— Qazaqstannyń Azamattyq Alıansyna 7 myńǵa jýyq úkimettik emes uıym kiredi. Biz birneshe jyl buryn AES salý máselesin kóterdik, sebebi atom elektr stantsııasy — jasyl tehnologııa. Ony álemniń eń damyǵan elderi qoldanyp keledi. AES sany boıynsha álemde AQSh birinshi tur — 96 reaktor. Sondaı-aq kóshbasshylar qatarynda Frantsııa bar. Qazaqstan aýmaǵyna 5 Frantsııany syıdyrýǵa bolady deımiz. Biraq bir Frantsııada 56 atom reaktory bolsa, onda ýran óndirisi boıynsha birinshi turǵan Qazaqstan týraly ne aıta alamyz? Osy sebepti Azamattyq Alıanstyń músheleri elimizdiń óńirlerinde qoǵamdyq talqylaýlar ótkizip jatyr, — dedi Qazaqstan Azamattyq Alıansynyń prezıdenti Baný Nurǵazıeva.
Qoǵamdyq sarapshy retinde qatysqan Medeý Ábishev AES qaýipsizdigi týraly pikir bildirdi.
— Búgingi talqylaýdyń mańyzdylyǵy joǵary, sebebi halyq ne úshin AES salynyp jatqanyn bilýi kerek. Qazir qoǵam ishindegi negizgi qorqynysh radıofobııaǵa baılanysty bolyp tur. «Jarylyp ketýi múmkin» degen sózder aıtylady. Biraq bul máselelerdiń bárin ǵalymdar da, úkimet te barlyq qaýipterdi eskerip, sheshim qabyldaıdy. Qarastyrylyp jatqan reaktorlar +3 býyndy reaktorlarǵa jatady. Ýaqytpen suryptalǵan, senimdi reaktorlar. Mundaı reaktordyń isten shyǵý qaýpi óte tómen, — dedi ál-Farabı atyndaǵy QazUÝ Teorııalyq jáne ıadrolyq fızıka kafedrasynyń meńgerýshisi Medeý Ábishev.
Eske salaıyq, buǵan deıin Qazaqstan beıbit ıadrolyq reaktordy qalaı paıdalanyp jatqanyn jazǵanbyz.
