Almatylyqtar 22 mlrd teńge kólik salyǵyn tólegen
ALMATY. KAZINFORM — Almatyda kólik quraldaryna salynatyn salyqtan túsken qarjy birshama ósken.
2025 jyly salyqty 456 328 adamǵa eseptelgen, bul 764 myń kólik. Salyqtyń jalpy somasy 21,9 mlrd teńge boldy. Bul ótken jylmen salystyrǵanda 2,3 mlrd teńgege artyq.
Almaty qalasy boıynsha Memlekettik kirister departamentiniń óndiristik emes tólemder basqarmasynyń basshysy Qanaǵat Kúlembaevtyń aıtýynsha, oń dınamıkaǵa qaramastan, kólik salyǵy boıynsha bereshek saqtalyp otyr. Búgingi kúni 60 835 azamattyń 3,9 mlrd teńge qaryzy bar, onyń 3,6 mlrd teńgesi kólik salyǵy boıynsha qaryzdar.
Spıker «e-Salyk azamat» mobıldi qosymshasy, kgd.kz saıty jáne onlaın-bankıng arqyly salyqty tez tóleýge bolatynyn atap ótti.
— Salyqty tóleý avtokóliktiń tirkelgen jeri boıynsha emes, turǵylyqty jeri boıynsha júzege asyrylatynyn este saqtaý óte mańyzdy, — dedi ol.
Eske salaıyq, buǵan deıin BI Group, BAZIS taǵy basqa kompanııalar 17 mlrd teńge salyq tólegenin jazǵanbyz.