Almatylyqtar 2026 jyldy qalaı qarsy aldy
ALMATY. KAZINFORM — Almatynyń 8 aýdanynda Jańa jylǵa arnalǵan is-sharalar ótti. Onyń ishinde basty merekelik kontsert Astana alańynda boldy.
31 jeltoqsan saǵat 18:00–den bastap Almatynyń eń tanymal oryndarynyń biri — Astana alańynda Jańa jylǵa arnalǵan kontsert bastaldy. Almatylyqtar men qala qonaqtaryna otandyq ónerpazdar merekelik kóńil-kúı syılaıdy.
Sahnada Maqpal Isabekova, Álisher Kárimov, Aqylbek Jemeneı, Beıbit Qorǵan, Dáýlet Janbolat, Jubanysh Jeksenuly, Dıana Ismaıl, Baqyt Shadaeva, Abaı Begeı, Tahmına Áshimbekova, Іnjý Ánýarbek, Ábik Jeksen, Ashat Tarǵyn, Dálel Ýashev, Maqsat Bazarbaev, Dáýren Baıbóri óner kórsetti.
Sonymen qatar Ringo, Ninety One, Ayree, Astra, Dakelot, Muzart Life toptary da kontserttiń kórkin qyzdyrdy.
Kontsert baǵdarlamasynyń erekshe bóligi DJ BATTLE boldy. Batl barysynda dıdjeıler jańajyldyq áýender men tanymal hıtterdiń zamanaýı óńdelgen avtorlyq mıksterin usyndy. Merekelik baǵdarlama 1 qańtar kúni saǵat 00:30-ǵa deıin jalǵasyp, otshashýmen aıaqtaldy.
Eske salaıyq, Jańa jyl merekesi qarsańynda Almatynda aýqymdy merekelik bezendirý jumystary júrgizildi. Qala turǵyndary men megapolıs qonaqtary jıi baratyn aýmaqtar — Abaı alańy, Astana alańy, Arbat jaıaý júrginshiler aımaǵy, Panfılov kóshesi, 28 gvardııashy-panfılovshylar atyndaǵy saıabaǵy, «Almaty Arena» aýmaǵy jáne «Atakent» kórme kesheni erekshe bezendirildi. Atalǵan alańdarda negizgi jańa jyldyq is-sharalar, kontsertter, jármeńkeler men otbasylyq demalys baǵdarlamalary boldy.
Sondaı-aq 13 jańa lokatsııa kórkemdik bezendirýden ótti. Olardyń qatarynda Saıran kóli, «Gúlder» jáne «Family» saıabaqtary, Gandı men Baıseıitova skverleri, «Aınabulaq», «Jasqanat», «Kókjıek» jáne «Qulager» shaǵyn aýdandary bar.
Jańa jyldyq bezendirý jumystary qalanyń 38 shaqyrym kóshesin, onyń ishinde 12 negizgi dańǵyl men magıstraldardy qamtydy. Almatyda 74 shyrsha ornatyldy, onyń 30-y — memlekettik, al 44-i — jekemenshik shyrshalar.
Eske salaıyq, 18 jeltoqsanda Almatynyń barlyq aýdanynda jańa jyldyq shyrshanyń shamy bir ýaqytta jaǵyldy. Negizgi merekelik is-shara Abaı alańynda ótti. Bul jerde bıiktigi 22 metr bolatyn qalanyń bas shyrshasy ornatylǵan.