Almatylyqtar 1939 jylǵy órt sóndirý ǵımaratynyń tarıhı kelbetin saqtaýdy ótindi
ALMATY. KAZINFORM – Almatynyń Medeý aýdanynda ornalasqan órt sóndirý bólimine kúrdeli jóndeý jumystary júrgiziledi.
Áleýmettik jelide qala turǵyny №5 mamandandyrylǵan órt sóndirý bóliminiń ǵımaratyna júrgiziletin kúrdeli jóndeý jumystarynan keıin onyń tarıhı kelbeti saqtalmaýy múmkin ekenin aıtyp shaǵym bildirdi. Ol sóziniń dáleli retinde ǵımarat syrtynda ilingen nysan pasportyn kórsetken.
Memlekettik satyp alý saıtynda Medeý aýdany Qonaev kóshesi, 132 mekenjaıynda ornalasqan órt sóndirý bólimine kúrdeli jóndeý jumystaryn júrgizýge baılanysty baıqaý ótken. Ondaǵy málimetke sáıkes, nysandy jańartýǵa 1 194 441 101 teńge jumsalady. Tapsyrys berýshi – Almaty qalasynyń Tótenshe jaǵdaılar departamenti, al jeńimpaz merdiger – «KazEvroStroı» JShS.
Almaty qalasynyń Tótenshe jaǵdaılar departamenti №5 órt sóndirý bóliminiń ǵımaratyna qatysty túsinikteme berdi.
- Barlyq jumys sáýlet jáne qala qurylysy salasyndaǵy jaýapty organdardyń talaptaryna sáıkes júrgizilip jatyr. Eskızdik joba Almaty qalasynyń Sáýlet jáne qala qurylysy basqarmasymen kelisilgen, ǵımarattyń syrtqy kelbeti ózgertilmeıdi. Al qasbetin nusqaýlarǵa saı materıaldan jasalýy kózdelgen. Mańyzdy atap óter jaıt — bul ǵımarat 1939 jyly, 86 jyl buryn salynǵan jáne qazirgi ýaqytta seısmıkalyq turǵydan kúsheıtilmegen. Osy ǵımaratta kún saıyn TJM qyzmetkerleri qyzmet atqarady, sondyqtan ǵımaratty jańartý olardyń qaýipsizdigin qamtamasyz etýge jáne tıisti eńbek jaǵdaılaryn jasaýǵa baǵyttalǵan, – dep habarlady departamentten.
Eske salaıyq, Almatyda qurylys talaptaryn buzǵan taǵy bir kompanııa lıtsenzııasynan qaǵyldy.