Almatylyqtar 10 tonnadan astam gýmanıtarlyq kómek jiberdi

ALMATY. KAZINFORM – Búgin Almatyda sý tasqynynan zardap shekken óńirlerge 10 tonnadan astam gýmanıtarlyq kómek jóneltildi. 

Almaly aýdanynyń komıýnıtı ortalyǵy bazasynda ashylǵan qabyldaý pýnkti 29 naýryzdan bastap jumys istep tur. Kún saıyn almatylyqtar zardap shekken aımaqtarǵa úles qosý úshin qajetti zattardy ákelip jatyr. Qala turǵyndary, kásipkerler men belsendi jastar da kómek qolyn sozdy.

6 kúnniń ishinde 10 tonnaǵa jýyq gýmanıtarlyq kómek jınaldy. Atap aıtqanda, 2,5 tonnadan astam kıim, 1 tonna gıgıena quraldary, 3,5 tonnadan astam azyq-túlik, turmystyq zattar jáne t.b. bar.

Almaty qalalyq jastar saıasaty basqarmasynyń málimetinshe, gýmanıtarlyq kómekti qabyldaý pýnktiniń jumysyna qalanyń 30-dan astam iri volonterlik uıymynan 100-den astam erikti jumyldyryldy. Bul rette Jastar saıasaty basqarmasy ıgi iske atsalysqan almatylyqtarǵa alǵysyn bildirdi. Sondaı-aq basqarmada eriktilerdiń eńbekqorlyǵy men qala turǵyndarynyń arqasynda qysqa merzim ishinde sý basqan aımaqtarǵa gýmanıtarlyq kómektiń jınalǵanyn atap ótti. 

Eske salsaq, Almatyda gýmanıtarlyq kómek qabyldaý pýnkti aptanyń sońyna deıin Almaly aýdany, Baıtursynov kóshesi, 22/1 mekenjaıynda saǵat 10:00-den 19:00-ge deıin jumys isteıdi. 

Qabyldanatyn gýmanıtarlyq kómek túrleri: azyq-túlik, aýyz sý, dári-dármekter men medıtsınalyq kerek-jaraqtar, kıim (jyly kıim, aıaq kıim, ish kıim, shulyq jáne t.b.), zattar (kórpe, uıyqtaıtyn qap, jastyq jáne t.b.), sharýashylyq taýarlary (shatyr, tósenish, termos, sham, paýerbank, sháınek, balalar ydystary, emizik) jáne gıgıena quraldary (pampers, áıelder gıgıenasy, sabyn, tis pastasy, sýsabyndar, maılyq, dárethana qaǵazy, jýǵysh zattar jáne t.b.).