Almatylyq júrgizýshiniń kóligimen Esentaı ózeninde júrgen vıdeosy tarady
ALMATY. KAZINFORM – Almatyda júrgizýshi birneshe zańdy buzyp, kóligin Esentaı ózenine aıdap kirdi.
Kýágerler túsirgen vıdeoda júrgizýshiniń kóligimen Esentaı ózenin keship, tóbesine zańsyz ornatylǵan shamdy qosyp júrgenin baıqaýǵa bolady.
Almaty polıtsııa departamenti áleýmettik jelide taraǵan vıdeoǵa qatysty túsinik berdi.
Resmı málimetke sáıkes, ol birden birneshe zańdy buzǵan: kóliginde memlekettik nómir bolmaǵan, ruqsat etilmegen shamdy qoldanǵan jáne sý arnasyna kóligimen kirgen.
– Qaýipsizdikke qater tóndiretin quqyqbuzýshylyqtarǵa jol berilmeıdi jáne olar dereý toqtatylady. Júrgizýshi barlyq anyqtalǵan epızod boıynsha jaýap beredi. Almaty polıtsııasy mundaı derekterge júıeli túrde áreket etedi jáne turǵyndardy zań men jol júrý erejelerine qurmetpen qaraýǵa shaqyrady, - dedi qalalyq polıtsııa departamenti jergilikti polıtsııa qyzmeti basqarmasy bastyǵynyń orynbasary Tımýr Noǵaıbaev.
Qazir atalǵan derek boıynsha tekserý júrgizilip jatyr.
Eske salaıyq, buǵan deıin Almaty turǵyny jasaǵan quqyq buzýshylyq úshin oraldyq júrgizýshige aıyppul salynǵanyn jazǵan edik.