Almatylyq júrgizýshilerge LEZ aımaǵyna kirgeni týraly habarlama kele bastady
ALMATY. KAZINFORM — Almatyda «Almaty turaqtary» mobıldi qosymshasynda tirkelgen júrgizýshiler Tómen shyǵaryndylar aımaǵyna (LEZ) kirgen sátte push-habarlama ala bastaıdy.
Jańa habarlandyrý júıesi — bıyl 28 sáýirden bastap iske qosylǵan kólik legin tsıfrlyq esepke alý ınfraqurylymyn engizýge baǵyttalǵan tehnıkalyq pılottyq jobanyń bir bóligi. Bul týraly ShJQ «Almaty parkıng» KMK ókilderi habarlady.
Habarlamalar aımaqqa kirgeni júıe arqyly tirkelgen kólik ıelerine jiberiledi. Habarlama mátininde pılottyq rejımde jumys isteıtin Tómen shyǵaryndylar aımaǵyna kirgen kúni, www.almaty-parking.kz saıtynyń siltemesi jáne +7 (727) 390 8000 baılanys nómiri kórsetiledi.
Almaty ákimdiginiń málimetinshe, pılottyq joba Bógenbaı batyr kóshesiniń ońtústigi, Abaı dańǵylynyń soltústigi, Jeltoqsan kóshesiniń shyǵysy jáne Dostyq dańǵylynyń batysy aralyǵyndaǵy aýmaqta júzege asyrylady.
Qazirgi kezde júrgizýshiler úshin qozǵalysqa eshqandaı shekteý, aıyppul nemese jol júrý aqysy qarastyrylmaǵan. Pılottyq jobanyń negizgi maqsaty — tehnologııalyq platformanyń jumysyn synaqtan ótkizý jáne qala ınfraqurylymynyń daıyndyq deńgeıin baǵalaý.
— Pılottyq kezeńniń basty mindeti — arnaıy baǵdarlamalyq jasaqtamany ázirleý úderisin baqylaý. Onyń ishinde kólikterdi keshendi esepke alý júıesi men LEZ aımaǵyna kiretin kólik legin taldaý modýli qamtylady, — delingen habarlamada.
Tehnıkalyq pılottyq kezeń bıyl 31 jeltoqsanǵa deıin jalǵasady. Osy ýaqyt ishinde atalǵan aýmaqtaǵy qozǵalys burynǵy qalypty rejımde júzege asyryla beredi.
Eske salaıyq, buǵan deıin Almatyda 28 sáýirden bastap tómen emıssııaly aımaqtyń (LEZ) pılottyq jobasy iske qosylǵanyn jazǵan edik.
