Almatylyq jas ǵalymdar «Taza Qala» platformasyn iske qosty
ASTANA. KAZINFORM — Ál-Farabı atyndaǵy Qazaq ulttyq ýnıversıtetiniń ǵalymdary Almaty qalasynyń tazalyǵyn qamtamasyz etý maqsatynda «Taza Qala» tsıfrlyq platformasyn ázirlep shyǵardy. Bul týraly Ǵylym jáne joǵary bilim mınıstrligi habarlady.
Atalǵan platforma qalanyń tazalyǵyna qatysty máselelerdi jınaqtap, júıeleýge jáne olarǵa jedel áreket etýge múmkindik beredi. Sonymen qatar jaýapty organdardyń jumysyn úılestirip, qabyldanǵan sharalardyń nátıjesin qoǵamǵa ashyq túrde usynýǵa jaǵdaı jasaıdy.
Platformany aqparattyq tehnologııalar jáne jasandy ıntellekt fakýltetiniń 2-kýrs magıstranty Nurlyhan Qaljanov ázirlegen. «Taza Qala» platformasyn qalanyń kez kelgen turǵyny paıdalana alady.
— Qoldanýshylar zańsyz qoqys oryndaryn nemese ózge de qoqys úıindilerin sýretke túsirip, platformanyń júıesine júkteıdi. Jasandy ıntellekt kómegimen qoqystyń kólemi anyqtalyp, tıisti qoqys jınaýshy kompanııaǵa jiberiledi. Qoqys jınaý jumystary aıaqtalǵannan keıin kompanııa atqarylǵan jumys jónindegi esepti platformaǵa engizedi. Keıin qalalyq tabıǵatty qorǵaý prokýratýrasy men ákimshilik mamandary tıisti tekseris júrgize alady, — deıdi Nurlyhan Qaljanov.
Qala turǵyndary platformaǵa kez kelgen tanymal braýzerler arqyly «Taza Qala» dep izdeý júıesine jazý nemese QR-kod arqyly kire alady. Bolashaqta platformaǵa arnalǵan arnaıy mobıldi qosymsha ázirleý josparlanǵan.
— Bizdiń ǵylymı joba Memleket basshysy Qasym-Jomart Toqaevtyń «Taza Qazaqstan» ekologııalyq aktsııasymen tikeleı úndesedi. Mundaı platforma Qazaqstanda alǵash ret iske asyrylyp otyr. Aldaǵy ýaqytta jobany elimizdiń barlyq óńirin qamtıtyndaı keńeıtý josparlanǵan. Qazirgi tańda platforma tolyqqandy jumys istep tur, — deıdi aqparattyq tehnologııalar jáne jasandy ıntellekt fakýltetiniń dekany Tımýr Imanqulov.
Ýnıversıtet ǵalymdary ázirlegen tsıfrlyq platformany ákimshilik mamandaryna tanystyryp, joba qalalyq ákimdik tarapynan qoldaýǵa ıe boldy.
Aıta keteıik, Astana qalasyndaǵy «Taza Qazaqstan» onlaın-platformaǵa 3 600-den astam ótinim tústi.