Almatylyq zeınetkerler shıpajaıǵa joldamany qalaı ala alady
ALMATY. KAZINFORM – Almatyda zeınetkerlerge shıpajaıǵa emdelýge joldama berý tártibi túsindirildi.
Qalada búginde 266 094 zeınetker turady.
Almatynyń jumyspen qamtý jáne áleýmettik baǵdarlamalar basqarmasynyń Kazinform agenttiginiń saýalyna bergen jaýabynda jyl saıynǵy shıpajaı joldamalarynyń sany jeńildik alýǵa quqyǵy bar jáne belgilengen talaptarǵa saı keletin azamattardyń ótinishteri negizinde aıqyndalatynyn málimdedi.
Almatyda 2026 jyly shıpajaı-kýrorttyq mekemelerge 3 899 joldama berý josparlanyp otyr.
Shıpajaılarmen kelisimsharttar jasalǵan
Basqarma málimetinshe, azamattardy shıpajaı-kýrorttyq emdelýge joldamamen qamtamasyz etý Almaty aýdandary ákimdikteriniń jumyspen qamtý jáne áleýmettik baǵdarlamalar bólimderi arqyly júzege asyrylady. Bul qyzmet zańnamaǵa sáıkes ótkiziletin memlekettik satyp alý rásimderiniń nátıjesinde kórsetiledi.
Qazirgi ýaqytta birneshe shıpajaımen kelisimshart jasalǵan. Olardyń qatarynda Almatydaǵy «Aqqaıyń» jáne «Demalys-K», Saryaǵashtaǵy «Aqjaıyq» pen «Bereke-7», sondaı-aq Túrkistan oblysyndaǵy «Sapa» shıpajaılary bar.
Tegin joldamany kimder ala alady
Basqarma málimetinshe, Almaty máslıhatynyń 2023 jylǵy 8 jeltoqsandaǵy №73 sheshimine sáıkes, shıpajaıǵa emdelýge beriletin áleýmettik kómek jylyna bir ret, 12 kúntizbelik kúnge deıin usynylady.
Ekinshi dúnıejúzilik soǵys ardagerlerine joldama tegin beriledi. Al eńbek ardagerlerine, basqa memleketter aýmaǵyndaǵy jaýyngerlik is-qımyldarǵa qatysqan zeınet jasyndaǵy ardagerlerge, jasyna baılanysty zeınetke shyqqandarǵa jáne 1986 jylǵy 17-18 jeltoqsan oqıǵalaryna qatysýshylarǵa joldama qunynyń bir bóligi tólenedi. Olar bazalyq zeınetaqyny esepke almaǵanda, zeınetaqy mólsheriniń 25%-y kóleminde tólem jasaıdy.
Sonymen qatar jasyna baılanysty zeınetkerlerdiń jan basyna shaqqandaǵy ortasha tabysy kúnkóris deńgeıiniń úsh eselengen mólsherinen aspaýǵa tıis.
2026 jyly Almaty boıynsha kúnkóris deńgeıi 50 581 teńge bolyp belgilengen.
Qaıda júginý qajet
Soǵys ardagerleri tegin joldama alý úshin turǵylyqty jeri boıynsha aýdandyq bólimge myna qujattardy tapsyrýy qajet:
• jeke kýálik;
• №068/ý nysanyndaǵy shıpajaı-kýrorttyq emdelýge joldama alýǵa arnalǵan anyqtama;
• «Ardagerler týraly» zańnyń 9-babyna sáıkes, ardager mártebesin rastaıtyn qujat.
Jasyna baılanysty zeınetkerler úshin qajet qujattar:
• jeke kýálik;
• №068/ý nysanyndaǵy anyqtama;
• zeınetaqy mólsheri týraly qujat;
• ótinish berýshiniń jáne otbasy músheleriniń tabysy týraly málimetter.
Eske salaıyq, buǵan deıin Belsendi uzaq ómir súrý ortalyqtarynda zeınetkerlerge qandaı qyzmetter tegin kórsetiletini týraly jazǵan edik.
