Almatylyq tutynýshylarǵa 721 mln teńgeden astam aqsha qaıtaryldy
ALMATY. KAZINFORM — Bıyl Almatydaǵy Saýda jáne tutynýshylardyń quqyqtaryn qorǵaý departamenti azamattardan túsken 15,1 myńnan astam ótinishti qarap, tutynýshylarǵa qaıtarylǵan qarajattyń jalpy somasy 721,7 mln teńgeden asty.
Departament basshysynyń orynbasary Nurlan Ábdıevtiń aıtýynsha, 2025 jyldyń qorytyndysy boıynsha Almatyda shamamen 300 ákimshilik jaza qoldanylǵan. Eń jıi kezdesetin zań buzý taýardy aıyrbastaýdan nemese qaıtarýdan bas tartý, tutynýshylardyń shaǵymyna ýaqytyly jaýap bermeý, sondaı-aq áleýmettik mańyzy bar azyq-túlik taýarlaryna belgilengen saýda ústemesin asyryp jiberý eken.
Ótinishterdiń negizgi bóligi bólshek jáne elektrondy saýda salasyna tıesili. Bilim berý, medıtsınalyq qyzmetter men kópshilik tamaqtanatyn salalardan kóbine taýarlar men qyzmetterdiń sapasy týraly tutynýshylardy jańylystyrýǵa baılanysty ótinish túsedi.
Sondaı-aq áleýmettik mańyzy bar azyq-túlik taýarlarynyń baǵa qalyptastyrýyna baqylaý júrgizýge erekshe kóńil bólinip otyr.
— 2025 jyly qalada deldaldyqty tergep-tekserý jónindegi komıssııanyń 24 otyrysy ótkizildi. Nátıjesinde 523 quqyq buzý anyqtalyp, joıyldy, 485 ákimshilik hattama toltyryldy. Bular halyq úshin ónimniń túpkilikti qunyn tómendetýge múmkindik berdi, — dedi Nurlan Ábdıev Óńirlik kommýnıkatsııalar qyzmetinde ótken brıfıng kezinde.
Eske salaıyq, buǵan deıin ShQO-da bıyl quqyǵy buzylǵan tutynýshylarǵa 37 mln teńge qaıtarylǵanyn jazǵanbyz.