Almatylyq tutynýshylarǵa 224 mln jýyq teńge qaıtaryldy
ALMATY.KAZINFORM –Byltyr Almaty qalasynyń Saýda jáne tutynýshylardyń quqyqtaryn qorǵaý departamentine 8 myńǵa jýyq ótinish tústi.Bul týraly Óńirlik kommýnıkatsııalar qyzmetiniń brıfınginde departament basshysynyń orynbasary Nurlan Ábdıev aıtty.
Spıkerdiń sózinshe, jospardan tys tekserýler men zańgerlik keńes berý nátıjeleri boıynsha tutynýshylarǵa 223 929 mln teńge qaıtaryldy.
«Ótinishterdi qaraý qorytyndysyna sáıkes, departament 100 jospardan tys tekserý júrgizip, 314 ákimshilik jaza qoldandy. Aryzdyń basym bóligi, bólshek saýda, elektrondyq saýda, turmystyq qyzmetter, turǵyn úı-kommýnaldyq sharýashylyq jáne bilim berý salasy boıynsha tústi», - dedi Nurlan Ábdıev.
Sonymen qatar, ol qoǵamdyq birlestikterdiń qyzmetin ıntegratsııalaý sheńberinde ahýaldyq shtab jumys isteıtinin atap ótti.
«Sapasyz azyq-túlik taýarlaryn anyqtaý jáne olardy ótkizýdiń jolyn kesý úshin Almaty qalasy boıynsha tehnıkalyq retteý jáne metrologııa, sanıtarlyq - epıdemıologııalyq baqylaý, saýda jáne tutynýshylardyń quqyqtaryn qorǵaý departamentteri monıtorıng júrgizýde», - dedi spıker.