Almatylyq soǵys ardageriniń armany oryndalady

ALMATY. KAZINFORM – 98 jastaǵy soǵys ardageri Leonıd Podkolzın óziniń óleńderin kitap etip shyǵarmaqshy.

Almaty qalasynyń Naýryzbaı aýdanynda turatyn Ekinshi dúnıejúzilik soǵysynyń ardageri Leonıd Nıkıtovıch Podkolzın 98 jasta. 17 jasynda maıdanǵa attanǵan ol Jeńis kúnin Germanııada atap ótken edi.

Ardager sol bir qandy maıdan jyldaryn esten shyǵarǵan emes, mine, 40 jyldan beri ol qoljazbalar men óleńderdi muqııat saqtap keledi. Ardagerdiń eń úlken armany - kitap shyǵarý, sol arqyly bolashaq urpaqqa mura qaldyrý.

Naýryzbaı aýdany ákiminiń orynbasary Mıras Nysanálıev atap ótkendeı, qazir eriktiler ardager jazǵan 300-den astam qoljazbany baspa formatyna ázirlep, baspahanamen kitapty shyǵarý jóninde kelisim jasap jatyr.

Eriktiler ardagerge «Taza Qazaqstan» respýblıkalyq ekologııalyq aktsııasynyń «Ónegeli urpaq» aptalyǵy, sondaı – aq «Almaty-bizdiń ortaq úıimiz» naýqany aıasynda úıin tazartýǵa kómektesti.

«Biz aýdandaǵy jalǵyz ardagerimizge bardyq. «Jaqynyńa járdemdes» aktsııasy aıasynda aýdanda zeınetkerler, múmkindigi shekteýli jandar, eńbek ardagerleri turatyn 102 úı tańdaldy. Eriktilermen birge biz olarǵa qajetti kómektiń barlyǵyn kórsetemiz. Sonymen qatar, az qamtylǵandarǵa azyq-túlik sebetterin ákelemiz», - dedi Naýryzbaı aýdany ákiminiń orynbasary. 

Onyń aıtýynsha, járdemdesý tek bir rettik aktsııa emes, belsendiler aýdan aqsaqaldaryna únemi qoldaý kórsetip keledi. Jalǵyzbasty, az qamtylǵan zeınetkerlerge, soǵys jáne eńbek ardagerlerine «Almaty – bizdiń ortaq úıimiz» naýqany aıaqtalǵannan keıin de járdemdesý jalǵasatyn bolady ári osy sharany iske asyrýǵa birneshe eriktiler bekitilgen. 

Esterińizge sala keteıik, 8 sáýir men 8 mamyr aralyǵynda qalada «Almaty-bizdiń ortaq úıimiz» naýqany ótip jatyr. Árbir turǵyn qalanyń damýy men tazarýyna úles qosa alady.