Almatylyq soǵys ardageri Vasılıı Zınchenko 101 jasqa toldy
ASTANA. KAZINFORM — Almaty qalasynda turatyn, Ekinshi dúnıejúzilik soǵys ardageri Vasılıı Zınchenko 101 jasqa toldy. Ol erligi men batyrlyǵy úshin «Otan soǵysy», «Qyzyl Juldyz» ordenderimen marapattalǵan.
Sondaı-aq «Stalıngradty qorǵaǵany úshin» jáne «Germanııany jeńgeni úshin» tósbelgilerin keýdesine taqqan.
Qart maıdanger soǵys dalasynda Stalıngradty qorǵaýǵa, Polsha men Ýkraınany azat etýge qatysqan. Berlın shabýylynyń bel ortasynda júripti. Búginde ol soǵys jyldaryn kúrsine eske alady.
- Polshaǵa kirgen kezde men barlaýshy boldym. Meni bir apta ustady, sodan keıin shaqyryp, soǵysqa attandyrdy. Biz Polshany tolyq basyp óttik, - deıdi Vasılıı qarııa Jibek joly arnasy tilshisine.
Soǵystan keıin Almatyǵa oralǵan V.Zınchenko jergilikti sút kombınatynda uzaq jyl eńbek etedi. Otbasynda úsh ul men bir qyz ósirdi. Búginde ol jeti nemereniń, on úsh shóbereniń jáne eki shópshektiń súıikti atasy.
101 jasqa tolǵan Vasılıı Zınchenko - tek maıdanger ǵana emes, tutas dáýirdiń kýágeri. Onyń erlikke toly ǵumyry keıingi urpaq úshin taǵylym men qurmettiń úlgisi.
Aıta keteıik, Memleket basshysy «Uly Otan soǵysyndaǵy Jeńiske 80 jyl» medali týraly Jarlyqqa qol qoıǵan bolatyn.