Almatylyq sapasyz onlaın kýrstan 840 myń teńge qaıtaryp aldy

ALMATY. KAZINFORM — Almaty qalasynyń turǵyny aǵylshyn tiliniń onlaın kýrsyna tólegen aqshasynyń bir bóligin qaıtaryp aldy. Bul týraly Tutynýshylardyń quqyqtaryn qorǵaý komıteti habarlady.

Vedomstvo málimetine sáıkes, Almaty turǵyny aǵylshyn tilin onlaın rejıminde úırenýge sheshim qabyldap, 1 200 000 teńgege jyldyq kýrs satyp alǵan. Alaıda birneshe sabaqtan keıin ol tańdaǵan baǵdarlamanyń óz talabyna saı kelmeıtinin túsingen. Tutynýshy qyzmet kórsetýshimen kelisimshartty buzýdy jáne aqshany qaıtarýdy talap etken, biraq ol oryndalmady.

Turǵyn quqyǵyn qorǵaý úshin Almaty oblysy boıynsha Saýda jáne tutynýshylar quqyǵyn qorǵaý departamentine júgingen. Sodan keıin tutynýshynyń talaptary naqty kórsetilgen sotqa deıingi shaǵym jazyldy.

— Departamenttiń aralasýynyń nátıjesinde qyzmet kórsetýshi kompanııa kelisimge kelip, oqýǵa tólengen aqshanyń bir bóligin qaıtarýǵa májbúr boldy. Tutynýshy 840 000 teńgesin qaıtaryp aldy. Kóbinese tutynýshylar, ásirese onlaın oqytý salasynda sapasyz qyzmetterge tap bolady. Eger qyzmet kelisimshartqa saı kelmese, sizdiń aqshańyzdy qaıtarý quqyǵyńyz bar ekenin bilý mańyzdy, — dep habarlady komıtetten.

Sondaı-aq Tutynýshylardyń quqyqtaryn qorǵaý komıteti tutynýshy retinde quqyǵy buzylǵan azamattarǵa kelesideı keńes beredi:

• Barlyq qujattardy saqtańyz: chekter, kelisimsharttar, kompanııamen hat almasý.
• Qyzmet kórsetýshi kompanııaǵa habarlasyńyz: máseleni beıbit jolmen sheshýge tyrysyp, jazbasha shaǵym jazyńyz.
• Saýda jáne tutynýshylar quqyǵyn qorǵaý departamentine habarlasyńyz. Mamandar sizdiń jaǵdaıyńyzdy túsinip, odan ári qalaı áreket etý kerektigin aıtyp beredi.

Eske salaıyq, buǵan deıin Almaty oblysynda tutynýshy quqyǵynyń buzylýy 68 paıyzǵa óskenin jazdyq.