Almatylyq polıtseıler úıde qarý ustaıtyn turǵyndardy tekserip jatyr
5 qazannan bastap megapolıste «Qarý» jedel aldyn alý sharasy ótip jatyr, dep habarlaıdy QazAqparat tilshisi.
Almaty qalalyq Polıtsııa departamentiniń ákimshilik polıtsııa basqarmasy azamattyq jáne qyzmettik qarý aınalymyn baqylaý bóliminiń bastyǵy Aıdos Qusaıynovtyń aıtýynsha, shara qarý qoldanyp jasalatyn qylmystardyń aldyn alýǵa baǵyttalǵan. Budan basqa, zańsyz aınalymdaǵy qarý men oq-dárilerdi anyqtaý jáne tárkileý jumystary da júrgizilýde.
«Іs-sharanyń birinshi kúninde 800-den astam jeke azamattyq jáne 10 qyzmettik qarý ıesi tekserilip, nátıjesinde azamattyq jáne qyzmettik qarýdy saqtaý sharttaryn, tirkeý jáne qaıta tirkeý erejeleri boıynsha 50-ge jýyq zańbuzýshylyq anyqtaldy. Óreskel zańbuzýshylyqtar úshin tirkelgen 28 qarý tárkilendi. Sondaı-aq, polıtsııanyń jedel qyzmetterimen birlese otyryp, 2 tirkelmegen qarý men 16 túrli kalıbrli patrondar tabyldy jáne tárkilendi»,- dedi Almaty qalasy PD ÁPB azamattyq jáne qyzmettik qarý aınalymyn baqylaý bóliminiń bastyǵy Aıdos Qusaıynov.
Sonymen qatar polıtsııa ókili, turǵyndardy azamattyq jáne qyzmettik qarý aınalymy salasyndaǵy barlyq zań talaptaryn saqtaý kerektigin eskertti. Sondaı-aq ruqsat qujattarynyń qoldanylý merzimin da nazarda ustaǵan jón.
