Almatylyq onkologtar jarty jylda 1 500 naýqasa ota jasady

ALMATY. KAZINFORM – Osy jyldyń basynan beri Almatynyń onkologııalyq ortalyǵynda 11 740 patsıent emdeldi, bul 2023 jylmen salystyrǵanda 1 547 adamǵa kóp. Atalǵan kórsetkishke hımıoterapııa men sáýlelik terapııa kiredi. 

«Onkologııalyq ortalyqta 2024 jyldyń birinshi jartyjyldyǵynda 1 500 hırýrgııalyq aralasý júrgizildi, bul 2023 jyldyń sáıkes kezeńimen salystyrǵanda 99 otaǵa artyq. Joǵary tehnologııalyq operatsııalardyń arqasynda ólim-jitim kórsetkishi 1,5%-dan 0,6%-ǵa deıin tómendedi», - dep habarlady densaýlyq saqtaý basqarmasynan.

Jyl basynan beri 11 740 patsıent emdeldi. Onyń ishinde 9 790 naýqas hımıoterapııa aldy.

«Budan bólek, radıologııa bólimi 624 onkologııalyq naýqasqa 10 608 sáýlelik terapııa seansyn jasady. Qaterli isikke kúdikti jáne onkologııalyq naýqastarǵa 340 627 dıagnostıkalyq tekserý júrgizildi», - dep atap ótti vedomstvodan.

Aıta keteıik, ortalyqtyń bes dárigeri sheteldiń jetekshi klınıkasynda taǵylymdamadan ótti. Bul olarǵa ozyq tehnologııalardy engizýge jáne emdeý sapasyn arttyrýǵa múmkindik beredi.