Almatylyq oqýshy UBT-dan 140 ball jınap, páterge ıe boldy
ALMATY. KAZINFORM – Almatyda jekemenshik mektepterdiń birin úzdik aıaqtaǵan Aısha Satybaldy Ulttyq biryńǵaı testileýden (UBT) 140 ball jınady. Osyndaı joǵary jetistigi úshin bilim ordasy oǵan páter syılady.
– 140 ball jınaǵanyma áli kúnge deıin sene almaı júrmin. Shyn aıtsam, ondaı nátıje kútken de joqpyn. Negizgi maqsatym – 130 balldan asý edi. Degenmen daıyndyqqa eki jylymdy arnadym: 10-synypta aǵylshyn tiline, 11-synypta tarıh pánine basymdyq berdim. Uıqysyz túnder men kúızelis boldy, biraq test tapsyrý jeńil ótti, - dedi Aısha.
Aısha Súleımen Demırel ýnıversıtetine «Eki shet tili» mamandyǵy boıynsha túsýge sheshim qabyldady. Bolashaqta aǵylshyn tili pániniń muǵalimi bolýdy armandaıdy. Sondaı-aq magıstratýrany shet elde oqýǵa nıetti.
Aısha Almaty qalasynda týyp-ósti. Aldymen memlekettik mektepte oqyp, keıin jekemenshik mektepke aýysqan. Otbasynda úıdiń úlkeni, artynan ergen eki inisi bar. Páter kiltin alǵan sátte qýanyshyn jasyra almady, ustazdary men jaqyndaryna alǵys bildirdi.
Mektep dırektory Muhıt Námetqulovtyń aıtýynsha, bıyl mektepti 147 oqýshy támamdady. Olardyń kópshiligi 100 baldan joǵary nátıje kórsetken, 15 túlek — úzdik attestatpen, al 9-y - «Altyn belgi» ıegeri atandy.
– Oqý jylynyń basynda mektep quryltaıshysy eń joǵary ball jınaǵan oqýshyǵa páter syılaımyn dep ýáde bergen. Bul oqýshylar úshin úlken motıvatsııa boldy. Menińshe, joǵary ball jınaýǵa degen umtylys pen osyndaı syılyq alý múmkindigi sheshýshi ról atqardy, - dedi mektep dırektory.
Aısha oqyǵan mektep Almatyda úsh jyldan beri jumys isteıdi. Osy ýaqyt ishinde eń joǵary kórsetkishter 138–139 ball bolǵan, al bıyl alǵash ret 140 ball shegine jetti.
Aıta keteıik, Aısha – UBT-dan eń joǵary 140 ball jınaǵan alǵashqy oqýshy emes. Buǵan deıin Túrkistandyq túlek Ábilhan Jánibek dál osyndaı nátıje kórsetken.
Ol ІT mamany bolýdy armandaıtynyn aıtqan bolatyn.
Sondaı-aq Naýryz aıynda aqyly UBT-dan eń joǵary 140 balldy Almaty oblysy Eńbekshiqazaq aýdanynyń túlegi Sanjar Qýandyq jınaǵan bolatyn.