Almatylyq oqýshy BUU shtab-páterinde álemniń úzdik 3 jas ınnovatorynyń qataryna endi
ALMATY. KAZINFORM – Almatydaǵy №79 gımnazııanyń 11-synyp oqýshysy Dana Qadyrbek jahandyq sý tapshylyǵy máselesine tyń sheshim usyndy.
Almaty ákimdiginiń málimetinshe, 2024-2025 jyldary Dana ǵaryshtyq tehnologııalar baǵytyndaǵy Kazakhstan Smart Space halyqaralyq baıqaýynda júldeli oryndarǵa ıe bolyp, ınjenerlik saladaǵy tereń bilimin dáleldegen. Odan keıin AQSh-ta ótken Olimpiad USA matematıkalyq olımpıadasynda ekinshi oryn ıelenip, Indonezııada ótken YISF halyqaralyq baıqaýynda jeńiske jetti.
Alaıda onyń eń úlken jetistigi aýadan sý alý tehnologııasyn ázirleýi boldy. 2025 jyly shilde aıynda Seýlde ótken WICO dúnıejúzilik jastar ǵylymı olımpıadasynda Dana altyn medal jeńip aldy. Qazylar alqasy «Atmosferadan sý jınaýǵa arnalǵan alıýmınıı fýmaraty negizindegi metallorganıkalyq qańqalyq qurylymdardy sıntezdeý» taqyrybyndaǵy jobany joǵary baǵalady.
2026 jyly sáýirde Dana taǵy bir bıikti baǵyndyrdy. BUU-nyń Venadaǵy shtab-páterinde UNIDO uıymdastyrǵan Cleantech Days Forum 2026 forýmynda ol álemniń úzdik 3 jas ónertapqyshynyń qataryna endi.
Jas ónertapqyshtyń jetistikteri el ishinde de joǵary baǵalandy: 2025 jyly 3 jeltoqsanda QR Sý resýrstary jáne ırrıgatsııa mınıstrligimen jobany pılottyq engizý týraly memorandýmǵa qol qoıyldy.
- Aýyz sý tapshylyǵyn sheshýge qabiletti tehnologııa usynǵan oqýshymyz Dana Qadyrbek ekenin maqtan tutamyz. Osyndaı daryndy jastar bizdiń basty strategııalyq resýrstarymyz jáne eldiń tehnologııalyq bolashaǵynyń kepili, — dedi Almaty qalasy Bilim basqarmasy basshysynyń mindetin atqarýshy Sáken Aralbaev.
Eske salaıyq, buǵan deıin elordalyq oqýshy oqý úderisin jetildiretin joba oılap tapqanyn jazǵanbyz.
