Almatylyq kýrsanttar Іle Alataýyndaǵy 3500 metrlik shyńdy baǵyndyrdy
ASTANA. KAZINFORM — Almatyda kúshtik qurylymdarǵa qarasty joǵary oqý oryndarynyń kýrsanttary Іle Alataýyndaǵy 3500 metr bıiktiktegi taý shyńyna kóterildi, dep habarlaıdy Qorǵanys mınıstrliginiń baspasóz qyzmeti.
Mınıstrlik málimetinshe, is-shara tárbıe qurylymdary ofıtserleri ınstıtýtynyń qurylǵan kúnine oraı uıymdastyrylǵan.
Aktsııanyń qaýipsizdigin qamtamasyz etýge Taý daıyndyǵy ortalyǵynyń nusqaýshylary men Qorǵanys mınıstrligine qarasty áskerı joǵary oqý ornynyń medıtsına qyzmetkerleri tartyldy.
Qurlyq áskerleri áskerı ınstıtýty bastyǵynyń orynbasary polkovnık Danııar Qudaıbergenovtiń aıtýynsha, joryqqa «tárbıe jáne ıdeologııalyq jumysty uıymdastyrý» mamandyǵy boıynsha bilim alyp jatqan kýrsanttar qatysqan.
— 19 qańtarda áskerlerdiń moraldyq-psıhologııalyq qamtamasyz etilýine, áskerı ujymdarda qolaıly ahýal qalyptastyrýǵa jáne áskerı qyzmetshilerdiń patrıottyq sanasyn damytýǵa jaýapty mamandar kásibı merekesin atap ótedi. Bolashaq tárbıeshi ofıtserlerge olardyń mamandyǵy tek bilimdi ǵana emes, sonymen qatar kúsh-qýat tózimdilikti, komandamen birlese jumys isteı bilýdi jáne jeke jaýapkershilikti talap etetinin kórsetý biz úshin óte mańyzdy boldy, — dep atap ótti ol.
Shyńdy baǵyndyrýǵa Qurlyq áskerleri áskerı ınstıtýtynan, Radıoelektronıka jáne baılanys áskerı-ınjenerlik ınstıtýtynan, ІІM akademııasynan, UQK akademııasynan jáne Shekara akademııasynan on kýrsanttan qatysty.
Radıoelektronıka jáne baılanys áskerı-ınjenerlik ınstıtýtynyń kýrsanty Darhan Dúısenbek shyńǵa kóterilý qatysýshylarǵa óz múmkindikterin jaqsyraq túsinýge jáne joldastarynyń qoldaýyn sezinýge múmkindik bergenin aıtty.
— Shyńǵa kóterilý arqyly komandalyq birlikti sezindik. Sonymen birge tabıǵat aıasynda erekshe sezimderdi bastan keshirdik. Kórsetken kómekteri men naqty nusqaýlary úshin tájirıbeli nusqaýshylarǵa alǵysymyz sheksiz. Mindetimizdi oryndaǵanymyzǵa maqtanamyz, — deıdi ol.
Іs-shara áskerı-patrıottyq qundylyqtardy nasıhattaýǵa, joǵary oqý oryndary arasyndaǵy ózara yntymaqtastyqty nyǵaıtýǵa jáne salamatty ómir saltyn dáripteýge baǵyttaldy. Uıymdastyrýshylar mundaı is-sharalardyń bolashaq ofıtserlerdiń kásibı, moraldyq jáne rýhanı qasıetterin qalyptastyrýǵa yqpal etetinin atap ótti.
Buǵan deıin Qazaqstandyq Anar Býrasheva álemdegi eń bıik jeti shyńdy baǵyndyrǵanyn jazǵan edik.