Almatylyq ǵalymdar ekologııany tazartýdyń tyń ádisin tapty

Qazaq ulttyq qyzdar pedagogıkalyq ýnıversıtetiniń fızıolog-genetıkteri Almaty qalasynyń aýasyn tazartýdyń ınnovatsııalyq ádisin oılap tapty. Ol úshin bir top ǵalym zııandy zattardy boıyna qarqyndy sińiretin ósimdikterdi ósirmek, dep habarlaıdy Kazinform.

Qala turǵyndarynyń densaýlyǵy men ekologııany jaqsartýǵa baǵyttalǵan ǵylymı-óndiristik jumystar bıyl kóktemde bastalady.

Ósimdikter Almaty oblysyndaǵy Kóldi agrobıostansasynyń bazasynda ósiriledi. Shamamen 5 gektar jerge arnaıy suryptaýdan ótken ósimdikter egilip, odan alynǵan kóshetter ákimdikpen aqyldasa otyryp, halyq kóp shoǵyrlanǵan aýmaqtarǵa otyrǵyzylady.

«Biz qalada jasyl araldar ósirýdi josparlap otyrmyz. Sonda ósimdikter aýany zııandy qaldyqtardan tabıǵı jolmen súzip, tazartady. Bul tásil asa tıimdi. Qorshaǵan ortanyń jaǵdaıyn aıtarlyqtaı jaqsartyp qana qoımaı, turǵyndardyń densaýlyǵyna da paıdaly bolmaq», - deıdi joba jetekshisi, ǵalym-fızıolog Asqar Qalekeshov.

Kóldi agrobıostansasy kezdeısoq tańdalyp otyrǵan joq. Buryn munda bıolog zertteýshiler men bolashaq bıologııa muǵalimderi zoologııa jáne botanıka boıynsha dalalyq zertteý jumystaryn júrgizetin. ıAǵnı praktıkalyq baza bar.

Aýadaǵy zııandy qaldyqtardy qarqyndy sińiretin ósimdikterdi ósirýden bólek, adam aǵzasyn tazartatyn bıologııalyq belsendi preparattar da daıyndalady. Ol úshin ǵalymdar Shyǵys Qazaqstan oblysyna arnaıy ekspedıtsııamen attanady.

Sondaǵy emdik ósimdikterdi, atap aıtqanda Altaı úshqatyn Almaty oblysyna jersindirý arqyly alynǵan ónimdi aǵzany saýyqtyrýǵa paıdalanady.

Aýany tazartýmen aınalysatyn toptyń quramynda ekologtar, fızıolog-genetıkter, doktoranttar bolady. Ǵalymdar 2024 jyly 500-ge jýyq kóshet alýdy josparlap otyr. Al 2025-te Almatyny kógaldandyrýǵa kirispek. Zertteý Genetıka jáne fızıologııa ǵylymı zertteý Instıtýtymen birlesip júrgiziledi.

Aıta keteıik, Almatynyń aýasyn tazartý boıynsha ǵylymı zertteý Qazaq ulttyq qyzdar pedagogıkalyq ýnıversıtetiniń esebinen qarjylandyrylady.