Almatylyq ǵalymdar Atyraý oblysynyń týrıstik áleýetin zertteýge kiristi
ATYRAÝ. KAZINFORM – Ál-Farabı atyndaǵy QazUÝ-dyń ǵalymdar toby Atyraý oblysynyń týrıstik áleýetin zertteýdi qolǵa aldy.
QazUÝ rekreatsııalyq geografııa jáne týrızm kafedrasynyń zerthana meńgerýshisi Aleksandr Artemevtiń aıtýynsha, ǵalymdar toby saparynyń birneshe maqsaty bar.
«Birinshiden, Qazaqstannyń batys óńirindegi týrıstik áleýetine zerdeleý júrgizýdi kózdedik. Ekinshiden, Atyraý oblysyndaǵy týrıstik marshrýttar men rekreatsııalyq aýmaqtaryna taldaý jasaımyz», - deıdi Aleksandr Artemev.
Almatylyq ǵalymdar toby aldymen «Aqjaıyq» memlekettik tabıǵı rezervatyna bardy. Bul – ıÝNESKO-nyń bıosferalyq rezervattardyń dúnıejúzilik jelisine kiretin tabıǵı qoryq. Jaqynda týrısterdi qabyldaýdy bastady. Munda saıahattyń eki túri usynylady. Onyń biri – qaıyqpen serýendeý, ekinshi baǵyty – jaıaý júrginshi marshrýty. Tabıǵı qoryq aýmaǵy 110 myń 500 gektardy quraıdy.
«Bizdiń ýnıversıtet ótken jyly elimizdiń batys óńirindegi týrıstik áleýetti zertteýge grant utyp alǵan edi. Soǵan sáıkes jumyss tobynyń quramyna ǵalymdar, zertteýshiler, gıdrogeologter, týrıster men ekonomıster, basqa da sarapshy mamandar kirdi. Qazir batys óńirdegi týrızmdi turaqty damytýdyń múmkindikterin zertteýge kiristik. Buǵan deıin Aqtóbe, Batys Qazaqstan oblystaryndaǵy týrıstik baǵyttardan taldaý júrgizdik. Al, Atyraý oblysyndaǵy lotos alqabyn, Saraıshyqtyń kóne qonysyn, Aqkegershin ústirtin men munaıly shahardyń kórikti jerlerine nazar aýdaramyz. Maqsatymyz – Atyraý oblysynyń ákimdigi jáne týrızm salasynyń mamandarymen birge óńirdiń áleýeti jáne týrıstik marshrýttary boıynsha ǵylymı-zertteý bazasyn qurýǵa úles qosý», - deıdi Aleksandr Artemev.
Eske sala ketelik, budan buryn Atyraý oblysyna úsh aıda 32 myńnan astam týrıst kelgenin jazǵan edik.
