Almatylyq dombyrashylar zardap shekken óńirlerge kómek jınaǵan turǵyndarǵa kúımen alǵys bildirdi
ALMATY. KAZINFORM - Almatyda 100 dombyrashy sý tasqynynan zardap shekken óńirlerge kómek jınaǵan qala turǵyndary úshin erekshe fleshmob ótkizdi.
Dombyrashylar ashyq aspan astynda kúılerdi oryndap, óneri arqyly qala turǵyndaryna qoldaý kórsetti. Kúıshiler keremet týyndylar turǵyndardyń rýhyn kóterip, jiger syılaıtynyna senimdi.
«Biz mundaı jaǵdaıdan shet qala almaımyz, eriktiler retinde de qatysamyz, sonymen birge óz emotsııamyz ben qoldaýymyzdy ónerimiz arqyly kórsetemiz. Sondyqtan halyqty jigerlendirý, qýattandyrý jáne qoldaý úshin qazaq kúılerin oryndaýdy uıǵardyq. Bizdiń halqymyz árqashan bireýdiń qasiretine beı-jaı qaramaıtyn, tabıǵatqa úlken qurmetpen qaraıtyn, tazalyq pen tártipti baǵalaıtyn. Onyń ústine qazir qala turǵyndary aýqymdy ekologııalyq jobaǵa qatysyp, azamattyq belsendilik tanyta alady», - dedi «Alataý» folklorlyq ansambliniń jetekshisi Tursynaı Pazyl.
Atalǵan fleshmobqa «Alataý» folklorlyq ansambliniń dombyrashylary men jas talanttar qatysty.
Aıta keteıik, tabıǵı apattan zardap shekken Atyraý oblysynyń turǵyndaryna almatylyqtar 30 tonnadan astam gýmanıtarlyq kómek jınady. Onyń ishinde 12 tonna azyq-túlik, shamamen 10 tonna kıim, 7,2 tonnadan astam gıgıenalyq zattar, 2 tonnadan astam turmystyq zattar, 200 keliden astam dári-dármek jáne t.b. kómek jınaldy. Bul baǵyttaǵy jumys jalǵasyp jatyr.
Eske salsaq, qalada «Almaty – bizdiń ortaq úıimiz» naýqany ótip jatyr. Bul rette qala turǵyndary óz aýlasynyń aýmaǵyna kóshet otyrǵyza alady, sondaı-aq, 20 sáýirde ótetin qalalyq senbilikke qatysa alady.
