Almatylyq dárigerlerge robot-hırýrgter ota jasaýǵa kómektesti
Almatydaǵy №4 qalalyq klınıkalyq aýrýhanasynda robot kómegimen tize jáne jambas býyndaryn aýystyrý boıynsha operatsııalar jasaldy, dep habarlaıdy Kazinform.
Aýrýhana baspasóz qyzmetiniń málimetinshe, robotty paıdalanǵan kezde emdeý ár naýqasqa jeke tásil prıntsıpi boıynsha júrgiziledi, robot operatsııaǵa deıin ımplanttyń ońtaıly ólshemin jáne ony ornatýdyń naqty ornyn tańdaı otyryp, jasandy býynnyń dál 3D josparlaýyn oryndaıdy.
«Qarashanyń 3-i men 7-si aralyǵynda biz Qazaqstanda robottyń kómegimen tize jáne jambas býyndaryn aýystyrý boıynsha alǵashqy operatsııalardy jasadyq. Biz endoprotezdeýge muqtaj 9 naýqasty tańdadyq. Patsıentterdi muqııat irikteý birneshe aı boıy júrgizildi. Dárigerler konsılıýmy ótip, jasandy býyndy dál 3D josparlaý úshin kompıýterlik tomografııa zertteýdiń tsıfrlyq nátıjeleri AQSh mamandaryna jiberildi. Robotty qoldanýdyń arqasynda operatsııa dál josparlanǵandaı - 1 mm-den az qatelikpen júzege asyryldy. Sondaı-aq jumsaq tinderdiń jaqsyraq saqtalýy qamtamasyz etilip, baılam apparatynyń ońtaıly tepe-teńdigine qol jetkiziledi», - deıdi Almaty №4 QKA hırýrgııa bólimshesiniń meńgerýshisi Meırambek Jumaǵulov.
Aýrýhana dırektory Birjan Dosmaılovtyń aıtýynsha, bul tehnologııa damyǵan elderde tanymal, ony AQSh, Kanada, Japonııa, Koreıanyń jetekshi klınıkalarynda qoldanyp keledi.
«Qazaqstanda robottyń kómegimen tize jáne jambas býyndaryn aýystyrý alǵashqy otalaryn jasadyq – bul ınnovatsııalyq ortopedııa úshin ári travmatologııalyq-ortopedııalyq kómekti jetildirýdiń jańa kezeńi. Jyl saıyn mundaı operatsııany qajet etetin naýqas sany artyp keledi. Máselen osy jyldyń 10 aıynda bizdiń aýrýhanada bir jarym myńnan astam býyn aýystyrý otasy jasaldy. Bizdiń maqsatymyz – qyzmetimizdi jetildirip, sapaly medıtsınalyq kómek kórsetý», – deıdi Birjan Dosmaılov.