Almatylyq dárigerler jańa týǵan nárestege kúrdeli operatsııa jasady

ALMATY. KAZINFORM – 23 naýryz kúni Almatydaǵy perzenthanalardyń birinde 34 aptada sırek kezdesetin týa bitken patologııamen ul bala dúnıege keldi. Sábıdiń moınynda úlken kıstozdy lımfangıomasy boldy. Tynys alý jáne júrek-qan tamyrlary jetkiliksizdigi isiktiń asqynýyna ákeldi.

Densaýlyq saqtaý basqarmasynan málim etkendeı, náresteniń salmaǵy 3844 g, boıy 46 sm bolyp týdy. Balany emhananyń neonatologııalyq brıgadasy kesar tiliginen keıin birden jasandy tynys alý apparatyna qosyp, Almaty qalasynyń Balalarǵa jedel medıtsınalyq kómek kórsetý ortalyǵyna jetkizdi.

– Bala óte aýyr jaǵdaıda kelip tústi. Ómir súrý kórsetkishteri baqylaýǵa alyndy.

Ýltradybystyq zertteý derekteri boıynsha, qursaqishilik kezeńde ólshemi 12 sm-ge jýyq túzilis bar degen dıagnoz qoıylǵan. Ol degenimiz bosaný kezindegi erekshe akýsherlik jáne hırýrgııalyq tásildi qajet etedi degen sóz,– dep habarlady basqarmadan. 

Sábıdi Balalarǵa shuǵyl medıtsınalyq kómek kórsetý ortalyǵynyń jańa týǵan náresteler jansaqtaý bólimine jatqyzyp, ota jasaýǵa daıyndady. 

26 naýryzda operatsııa sátti ótti. 

Vedomstovadan atap ótkendeı, kishkentaı naýqas operatsııadan keıin úsh apta boıy jansaqtaý bóliminde dárigerlerdiń baqylaýynda boldy. Keıin qanaǵattanarlyq jaǵdaıda úıge shyǵaryldy. Operatsııadan keıin tigister jazylyp, ýaqyt óte kele múldem kórinbeıtin bolady.

Osyǵan deıin, Almatyda Shvetsııadan kelgen dáriger 7 qazaqstandyqqa tegin operatsııa jasaǵany týraly jazǵanbyz.