Almatylyq dárigerler jańa týǵan «quıyrshyqty nárestege» ota jasady
Almaty qalalyq balalar shuǵyl medıtsınalyq kómek kórsetý ortalyǵynyń dárigerleri densaýlyǵynda týabitti kináraty bar nárestege ota jasady, sábıde qursaqta jatqanda quıymshaq negizinde isik paıda bolǵan, dep habarlaıdy Kazinform.
Almaty qalalyq densaýyq saqtaý basqamasy málim etkendeı, patologııanyń bul túri qatersiz, biraq sábı ómiriniń alǵashqy aılarynda qaterli isikke aınalý qaýpi boldy.
Náresteniń dúnıege kelgenine nebári 12 kún, ol týǵannan keıin ekinshi kúni perzenthanadan aýrýhanaǵa jetkizildi.
«Bala quıymshaq negizinde ornalasqan segizkóz-quıymshaq teratomasymen dúnıege keldi. Bul neonataldy kezeńdegi balalarda jıi kezdesetin isik. Іsiktiń ólshemi 10 h 8 sm, aralas pishindi. Týǵannan keıingi úshinshi kúni nárestege ota jasaldy, isik tolyǵymen joıyldy, balanyń jaǵdaıy qanaǵattanarlyq, ol úıge shyǵýǵa daıyndalyp jatyr», - deıdi irińdi-keýde hırýrgııasy bólimshesiniń meńgerýshisi Samatbek Myrzahmet.
Dárigerdiń sózinshe, Ortalyqta aıyna 100-ge jýyq jańa týǵan nárestege ota jasaıdy.
«Árbir ata-ana mundaı aýrýdyń sebebin bilgisi keledi, týa bitken kemistikke ishki jáne syrtqy faktorlar, ekologııa, klımat, tuqym qýalaýshylyq, juqpaly aýrýdyń barlyq túri áser etedi. Damý kemistiginiń aıqyn sebepteriniń biri júkti kezinde áıel vırýstyq ınfektsııamen aýrǵan», - deıdi dáriger.