Almatylyq dárigerler soǵys ardagerlerin medıtsınalyq tekserýden ótkizip jatyr
ALMATY. KAZINFORM - Almatylyq dárigerler soǵys ardagerleriniń úıin aralap, medıtsınalyq tekserýden ótkizip jatyr. Bul is-shara 15 mamyrǵa deıin jalǵasady.
Megapolıstegi ár emhana óz ýchaskesinde tirkeýde turǵan ardagerlerdiń úıine dárigerlerdi jiberip, keshendi medıtsınalyq tekserýden ótkizip jatyr.
№ 7 emhananyń medıtsına qyzmetkerleri, atap aıtqanda nevropotolog, kardıolog, terapevt, ýchaskelik meıirbeke, psıholog 98 jastaǵy soǵys ardageri Anatolıı Popovtyń úıine baryp, keshendi tekserý júrgizdi.
Kardıolog dárigerdiń sózinshe, ardagerdiń densaýlyǵy bir qalypty.
«Ardager atamyzdyń densaýlyǵynda aıtarlyqtaı aýytqý joq. Óziniń jasyna saı ózgerister bar. Kúndelikti ishetin dárilerine korektsııa jasap, qosymsha preparattar usyndyq. Ol kisige jylyna 2-3 ret kelip profılaktıkalyq túrde tekserip turamyz. Sońǵy tekserý men qazirgi tekserýdi alatyn bolsaq, densaýlyǵynda qatty bir ózgeris joq»,- dedi Almaty qalasyndaǵy №7 emhananyń kardıolog dárigeri Dýman Nuǵmanov.
Sondaı-aq dárigerler almatylyq ardagerge mamandandyrylǵan aýrýhanalarda emdelýge, ońaltýǵa, kompıýterlik tomografııa, MRT, ýltradybystyq zertteýge joldama berdi.
№36 qalalyq emhananyń da mamandandyrylǵan dárigerleri úı jaǵdaıynda soǵys ardagerleriniń qan qysymyn, qandaǵy qant deńgeıin ólshep, túrli zertteý júrgizdi.
Aıtýlarynsha, bul mańyzdy shara patsıentterdiń densaýlyǵyna qatysty problemalardy anyqtaýǵa jáne keıingi asqynýdyń aldyn alýǵa baǵyttalǵan.
Aktsııa aıasynda emhananyń áleýmettik qyzmetkerleri ardagerlerdi quttyqtap, baǵaly syılyqtar tabys etti.
Densaýlyq saqtaý basqarmasynyń málimetinshe, bul is-shara 15 mamyrǵa deıin jalǵasady.
Qazirgi ýaqytta Almatyda 43 soǵys ardageri men olarǵa teńestirilgen azamat turady.
Aıta keteıik, Jeńistiń 79 jyldyǵyna oraı ardagerlerge 2 mln teńgeden beriledi.
Tólem «Azamattarǵa arnalǵan úkimet» memlekettik korporatsııasy» KEAQ-nyń Almaty qalasynyń aýdandyq ákimdikteri ekinshi deńgeıli bankterdegi shottaryna ótinishterdi talap etpeı, tizimge sáıkes beriledi.
