Almatylyq dárigerler salmaǵy nebári 37 keli naýqasty aman alyp qaldy

Kardıologııa jáne ishki aýrýlar ǵylymı-zertteý ınstıtýtynyń dárigerleri Kron aýrýyna shaldyqqan 50 jastaǵy naýqasty aman alyp qaldy, dep habarlaıdy Kazinform.

Almaty oblysynyń turǵyny Alma Nurkenovanyń aıtýynsha, ishekten qan ketip, aýyrǵanyna eki jyl bolǵan. Dárigerler derttiń sebebin anyqtaı almaǵandyqtan, hali kúnen- kúnge nasharlap salmaǵy 37 kelige deıin túsken.

Naýqasqa «Kron aýrýy men oıyq jaraly kolıt» dıagnozyn Kardıologııa jáne ishki aýrýlar ǵylymı-zertteý ınstıtýtynyń dárigerleri qoıdy.

«Bizge aýyr jaǵdaıda túsken 50 jastaǵy naýqasqa medıtsınalyq tekserýler júrgizilip, oǵan stenoz túrinde aýrýdyń asqynǵan (ishektiń tarylýy) Kron aýrýy dıagnozy qoıyldy. №1 terapııa bólimshesinde birneshe ret statsıonarlyq em qabyldady. Emdeýden keıin patsıentte aýrýdyń turaqty remıssııasy baıqalady. Ol sondaı-aq endoskopııalyq bólimshede emdeldi, oǵan birneshe ret toq ishektiń ballondyq dılatatsııasy jasaldy», - dep atap ótti endoskopııa jáne ınterventsııalyq gastroenterologııa bólimshesiniń meńgerýshisi Alma Habıjanova.

Dárigerdiń sózinshe, Kron aýrýy men oıyq jaraly kolıt jazylmaıtyn aýrýlarǵa jatady.
«Soǵan qaramastan, olardy ýaqtyly durys dıagnostıkalaý jáne emdeý arqyly aýrýdyń aýyr túrine ótýine jol bermeı, turaqty remıssııaǵa qol jetkizýge bolady. Osynyń arqasynda ishektiń qabyný aýrýlaryna shaldyqqan adamdar tolyqqandy ómir súrip, eńbekke qabilettiligin saqtaı alady», - deıdi dáriger.

Alma Nurkenova aldaǵy ýaqytta úshinshi ret ballondyq dılatatsııasyn jasatady (jabysyp qalǵan ishekterdi ashyp, keńeıtý protsedýrasy).

«Ómirimdi saqtap qalǵan kásibı sheberligi joǵary, bilikti mamandarǵa alǵysym sheksiz. Qazir densaýlyǵym jaqsy, tipti salmaq qostym», - deıdi ol.