Almatylyq dárigerler salmaǵy 1500 gramnan tómen 75 sábıdiń ómirin saqtap qaldy
ALMATY. KAZINFORM — Almatyda Dúnıejúzilik shala týǵan balalar kúnine oraı analar sábıiniń ómirin saqtap qalǵan dárigerlermen kezdesti.
Almaty qalasy qoǵamdyq densaýlyq saqtaý basqarmasynyń málimetinshe, № 2 qalalyq perınataldyq ortalyǵyna shala týǵan, dárigerlerdiń arnaıy kútiminde bolǵan balalar men olardyń analary keldi. Kezdesýde ata-analar sábılerdi aman alyp qalý úshin kúresken dárigerlermen qaıta qaýyshty. Analar medıtsına mamandaryna kórsetken qamqorlyǵy men sábıleriniń ómirin saqtap qalǵany úshin rızashylyǵyn jetkizdi.
Jalpy 2026 jyldyń 10 aıynda ortalyqta salmaǵy 1500 gramnan tómen 75 sábı merziminen buryn dúnıege kelgen. Olardyń 24-inde týǵan kezdegi salmaǵy 1000 gramǵa da jetpegen.
— Kezdesýde tanystyrylǵan sábılerdiń eń kishkentaıy júktiliktiń 26-aptasynda 679 gramm salmaqpen týǵan. Ol ortalyqta 87 kún boıy kútimde bolǵan. Al salmaǵy 700 gramm bolyp dúnıege kelgen taǵy bir sábı mamandardyń baqylaýynda 88 kún jatqan. Árbir osyndaı oqıǵanyń artynda neonatologter, reanımatologter, meıirgerler men ortalyqtyń búkil ujymynyń orasan zor eńbegi tur, — dep habarlady basqarmadan.
Eske salaıyq, Qazaqstanda sońǵy bes jylda 142 myńǵa jýyq sábı merziminen buryn dúnıege kelgen.