Almatylyq dárigerler magnıt jutyp qoıǵan eki balany aman alyp qaldy
ALMATY. KAZINFORM – Almatynyń balalar shuǵyl medıtsınalyq kómek ortalyǵynyń dárigerleri qańtar jáne aqpan aıynda usaq magnıtterdi jutyp qoıǵan eki balaǵa shuǵyl ota jasady.
Qalalyq densaýlyq saqtaý basqarmasynyń málimetinshe, 4 qańtarǵa qaraǵan túni ishi qatty aýyrǵan eki jasar sábı Balalarǵa jedel medıtsınalyq kómek kórsetý ortalyǵynyń qabyldaý bólimine tústi.
– Kishkentaı naýqastyń aýrýhanaǵa túsken kezdegi jaǵdaıy aýyr dep baǵalandy. Biz jedel tómen ishek ótimsizdigin, perıtonıt jáne ınfektsııalyq-ýytty shokty anyqtadyq. Balanyń isheginen 13 usaq magnıtti kórdik, - dedi qabyldaý bóliminiń jaýapty hırýrgi Azat Mamyrasyl.
Balaǵa shuǵyl túrde operatsııa jasaldy.
– Biz ortańǵy laparotomııa jasap barlyq 13 magnıtti ash ishekten shyǵardyq. Operatsııadan keıin bala reanımatologtardyń baqylaýymen qarqyndy terapııa bóliminde biraz ýaqyt boldy. Sodan keıin ol beıindik bólimge aýystyryldy, al bir aptadan keıin úıine shyǵaryldy, - dedi hırýrg.
Ekinshi jaǵdaıda, 7 jastaǵy bala ishki aǵzasyndaǵy magnıt oıynshyqtarmen 9 kún júrgen.
– Bala 27 qańtardan bastap aýyrǵan. Ata-anasy balasynyń jaǵdaıy nasharlaǵannan keıin jeke klınıkaǵa aparǵan. Ol jerde rentgenge túsirip, isheginde bógde zattyń baryn anyqtaǵan. Dárigerler aýrýhanaǵa júginý qajet ekenin eskertken, biraq ata-anasy balanyń jaǵdaıyn óz baqylaýlaryna alǵan, – dedi Azat Mamyrasyl.
Kún ótken saıyn balanyń hali nasharlaı túsken. 4 aqpanda balanyń ishi qatty aýyryp, álsirep, kúnine 15 retke deıin qusqan. Tek osy kezde ǵana onyń jaqyndary jedel járdem brıgadasyn shaqyryp, shuǵyl túrde balalarǵa jedel medıtsınalyq járdem kórsetý ortalyǵyna alyp kelgen.
– Biz balaǵa kúrdeli operatsııa jasadyq. Іshtegi magnıtti alyp tastadyq. Qýanyshqa oraı, balany aman alyp qaldyq. Qazir ol tolyq saýyǵyp, aýrýhanadan shyǵaryldy, - dep atap ótti dáriger.
Osyǵan deıin, Aqmola oblystyq balalar aýrýhanasynyń hırýrgtary tórt jastaǵy balanyń ishinen 39 túıir magnıttik monshaqty alyp shyǵyp, búldirshinniń ómirin saqtap qaldy.