Almatylyq dárigerler er adamǵa birden úsh ota jasap, aıaqqa turǵyzdy

ALMATY. KAZINFORM - Almatyda oń jaq jambastyń artqy shyǵýy, oń jaq san súıegi basynyń aseptıkalyq nekrozy, oń jaq tize býynynyń búgý kontraktýrasy dıagnozy qoıylǵan er adamǵa birden úsh operatsııa jasaldy.

Almatyda Ortalyq qalalyq klınıkalyq aýrýhanaǵa 44 jastaǵy er adam túsken. Naýqas sońǵy 6 aı boıy úıinde tura almaı, tek jatqanyn aıtqan. Jiti klınıkalyq tekseristen soń oǵan bir ýaqytta úsh birdeı ota jasaý týraly sheshim qabyldandy.

Almaty qalalyq Qoǵamdyq densaýlyq saqtaý basqarmasynyń málimetinshe, naýqasqa birinshi kezekte urshyq oıyǵynyń artqy qabatyndaǵy aqaýdy eskere otyryp, dárigerler oń jaq jambas býynyna alǵashqy-revızııalyq endoprotezdeý jasady. Ekinshi kezekte tize býynynyń qalypty búgilýin qamtamasyz etý úshin tize býynynyń ıilgish baılamdaryn kesý boldy, sońǵy úshinshi ota - tize býynynyń birte-birte sozylýyna arnalǵan Ilızarov topsaly-bizdi-ózekti apparatyn ornatý jasaldy.

Kishi jiliktik júıke neıropatııasy jáne kompartment-sındromy sııaqty qaýipti asqynýlarǵa baılanysty dárigerler otadan keıingi kezeńde tize býynynyń birtindep keńeıýin qamtamasyz ete otyryp, otany sátti oryndap shyqty.

«Ilızarov apparaty kómegimen kún saıyn túzetý júrgizildi. Bul kútilgen nátıjege qol jetkizýge múmkindik berdi. Alty aı ishinde naýqastyń júıke júıesi men qan tamyry ıkemdiligin joǵaltqan edi. Ota asqynýsyz ótip, sátti aıaqtaldy», - dedi Qanat Táýekelov.

Aıta keteıik, naýqasqa kúrdeli otany travmatolog-ortopedter Qanat Táýekelov, Arman Abdýrazakov, Rýslan Tokýshev pen anestezıologtar jasap shyqty.